منتدى منارة دشنا



 
الرئيسيةس .و .جالتسجيلدخول

شاطر | 
 

 لشعب يريد تنوير العقول وتغذية الشعب بالفول........

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
jopa
عضو فعال
عضو فعال


ذكر

العمر : 25
عدد الرسائل : 523
تاريخ التسجيل : 04/09/2011

مُساهمةموضوع: لشعب يريد تنوير العقول وتغذية الشعب بالفول........   5/10/2011, 10:17 pm

الشعب يريد تنوير العقول وتغذية الشعب بالفول........
================================
أخوانى المحترمين أنا كان عندى عادة غريبة وقديمة من يوم ما كنت فى ثانوى وهى ان اركب التروماى من عند بيت والدى فى العباسية لحد شبرا وارجع فيه تانى وكنت أجد متعتى فى تأمل الناس وتصرفاتهم ومراقبة الشارع من شباك هذه المواصلة القديمة والبطيئة .. والنهاردة كنت زهقان من الشغل ومن القرف اللى حواليا فى كل مكان فقررت أن اركن عربيتى وادور على أى ترماى لسه شغال واركبه وأحييى الذكرى القديمة .. المهم ركبت المترو اللى رايح من روكسى لالماظة .. وجه حظى اننى قعدت منفردآ قدام راجل عجوز مسن لابس جلابية بلدى ولفت نظرى أنه ماسك سندوتش فول فى عيش بلدى ونازل اكل فيه بنهم شديد .. ومش عارف ليه جه على بالى مقولة (( ان أكل الفول يغيب العقول )) وأن للفول علاقة خاصة مع المصريين لايفهمها سوى المصريين .. المهم أنا لقيت الراجل الطيب دا بيعزم عليا بسندوتش من معاه فقلت له لا شكرآ ياحاج .. لقيته بيقولى (( كل اللى يشوف الفول ولاياكلش يحب ولا يطولش )) ضحكت وقررت ان أقيم حوار معاه ومش عارف ليه لعبت فى موبايلى وشغلت مفتاح تسجيل الاصوات وكأنى كنت حاسس اننى هأسمع احلى اجابات عن اسئلتى من هذا الرجل والغريبة انه لم يجاوبنى عن أى سؤال بردود عادية بل كانت كل ردوده من الامثال الشعبية المصرية القديمة ثم يسكت لكى اسأله سؤال أخر .. فاليكم محتوى الحوار واجاباته الرائعة : ---

س : انت عاجبك اللى بيحصل فى البلد دا ياحاج ؟
(( أضرب عاد بثمود وارقص مع القرد اذا حكمت ما دمت بدولة القرود ))

س : يعنى ايه كلامك دا يابا مش فاهم ؟
(( يكرة تروحى يا ناكرة خيرى وتشوفى زمانى من زمن غيرى ))

س : شكلك كده زعلان انهم شالوا حسنى مبارك ؟
(( اللى مالوش كبير بيشتريله كبير يا ابنى ))

س : صدقت يابا فيه ناس كتير اتحولوا عالراجل ده ومش شايفين الا اعماله السيئة ؟
(( الله يلعنك يازمان ياللى خليت للندل كلام وجبت اللى ورا قدام ))

س : الراجل دا لو كان ساب الحكم من مدة ماكانش حصل فيه كدا ؟
(( أتوصوا بينا ياللى حكمتونا احنا العبيد وانتوا اللى اشتريتونا ))

س : طب أنت ايه رأيك هو التغيير اللى حصل دا ماكانش له طريقة تانية أقل أضرارآ ؟
(( قوله فى وشه ولا تغشه)) و (( وكله سلف ودين حتى المشى على الرجلين ))

س : انت مش شايف أن الناس أختصرت الفساد كله فى مبارك ونسيوا الفساد جواهم ؟
(( اللى حبه ربه واختاره جابله حاجته لباب داره . ))

س : تفتكر ياحاج الراجل دا هياخد حكم ويتسجن او يعدموه ؟
(( العجل لما بيقع بتكتر سكاكينه . ))

س : أنت بتتفرج عالاخبار والبرامج فى التلفزيون اليومين دول ؟
(( أخبار البلد مع مين مع العمى والمكسحين . ))

س : ربنا يستر على البلد ياحاج حالها سئ جدآ
(( أن ماشتكى العيان حاله يبان . ))

س : أيه رأيك يابا فى المظاهرات والاعتصامات اللى موقفة الحال دلوقتى ؟
(( الخيبة حاطة والباب مفتوح سده قوام لريحتها تفوح. ))

س : بس البلد مليانة خونة بيهدموا فيها وبيخربوها ؟
(( ياخاين عامل من الليل ستارة بكرة يروح الليل و تظهر الامارة. ))

س : أنت شايف ايه اللى يهدى الوضع الخطر على البلد دلوقتى ؟
(( طوبة على طوبة تخلى العركة منصوبة ))
(( اللى ما يقرا العواقب مالوش فى الدنيا صاحب . ))

س : أنت شايف مين المناسب يحكم البلد دلوقتى من المرشحين ياحاج ؟
(( ماتفرحوش فى اللى انعزل الا لما تشوفوا اللى نزل . ))

س : أنت ايه رأيك يابا لو الاخوان المسلمين مسكوا الحكم فى البلد ؟
(( ما أخيب من ستى الآ سيدى . ))
(( قال بابا شرفنى قال لما يموت اللى يعرفنى . ))

س : طيب أيه رأيك فى البرادعى ؟
(( سكتناله دخل بحماره حتى البردعة شيلناهاله. )) ولو مسك (( يبقى جزرة وقطمها جحش . ))

س : الناس قربت تجوع مافيش شغل ولا انتاج والبطالة زادت ؟
(( اللى ياخد قوتى يبقى ناوى على موتى. ))

س : احنا محتاجين سنين طويلة عشان بس نرجع اللى كان ؟
(( ان كتر عليك الشغل فرقه على الايام . ))

س : يابا انت بكلامك دا تنفع تشتغل مستشار للدولة ؟
(( أنصح الجاهل يعاديك . ))
وبعدين (( ما حد خالى من الهم حتى قلوع السفينة واوعاك تقول للندل يا عم أذا كان حاكم مدينة . ))

س : أنا اتشرفت بمعرفتك بجد بصراحة أنت راجل حلو ؟
(( الحلو حلو لو قام من النوم والوحش وحش لو غسل وشه كل يوم . ))


... عرفتوا ليه بقا كان عنوان مقالى هذا ( الشعب يريد تنوبر العقول بتغذية الشعب بالفول )
أشكركم .. ودمتم جميعآ .
الرجوع الى أعلى الصفحة اذهب الى الأسفل
 
لشعب يريد تنوير العقول وتغذية الشعب بالفول........
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى منارة دشنا :: القسم العام :: الموضوعات العامة-
انتقل الى: