منتدى منارة دشنا



 
الرئيسيةس .و .جالتسجيلدخول

شاطر | 
 

 اسبوعيات زوج محتاج خدمة

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
محمد جلال
مدير
مدير
avatar

ذكر

العمر : 41
عدد الرسائل : 3184
تاريخ التسجيل : 20/08/2008

مُساهمةموضوع: اسبوعيات زوج محتاج خدمة    27/8/2010, 4:04 pm

أسبوعيات زوج محتاج خدمة ما بعد الزواج

الاسبوع الأول
اسبوعيات سى السيد وست الحسن
بسم الله نبدأ الجلسة
الحلقة الثانية
خخخخخخ امممممممم تسسسسس اممممم
دة شعار النائمين فى العسل
وبدون سماع صوت مراتك وهى قاعدة فى المطبخ بتعد الاطباق الصينى
وبتشيل اثار الكرسى المكسور برعاية
سى شاهين افندى
كبير شباب الغازكوية

اللى كسر الكرسى واتضح انه كان واكل واحد صاحبه قبل ما يجى بيتنا المتواضع.
وكنت نايم على السرير الجديد اللى مرتبته ريش نعام
بس مكنتش متغطى عشان كنت مستعجل

وحلمت حلم جميل كانى كنت لسه فى ايام الخطوبة وبحلم بخطيبتى اللى مدلعانى
وعايشين على نغمات ورسايل الموبيلات اللى ساعات بتبقى ببلاش لفترة محدودة
ولكن يشاء الزمن ان تصبح خطيبتى هى مراتى مع سبق الاصرار والترصد
واللى لسه قاعدة فى المطبخ بتقول
مفيش اهتمام .. مفيش مسئولية .. سايبهم كده يكسروا حاجتى .. كنت فين ياراجل انت
يااااا....اااا..... الخ الخ الخ
طبعا الكلام ده اسطوانة محفوظة وتعرض بجميع البيوت الزوجية
مجااانا بدون رسوم وفى اى وقت واى مكان .
*****************************
ياسلام الواحد فى بداية الجواز واخد اجازة اسبوعين حلوين
راحة من الشغل والروتين
ويصحى من النوم عشان ينام تانى فعلا اسبوعين اجازة شكلهم هيبقوا عسل
لكن حظى بقى فى اول يوم جواز يجولى بتوع الغاز
قاصدينها دول ولا ايه
؟!؟
*********************
وانا نايم بحلم
حسيت فجاة بكابوس مزعج دخل على حلمى الجميل القصير
كان كابوس عبارة عن
مراتى داخلة عليه بسكينة كــبــيـــــرة
ايه ده ؟!!؟
دة حلم مش حقيقة
لا لا دى حقيقة
ولقيتها بتقرب منى
وتقرب وتقرب وتتحرك وتتحرك وتستمر وتستمر
وتقولى
سى السيد
يا سى السيد
ياجوزى
ياحبيبى
متزعلش منى اكمنى كنت مضايقة بسبب بتوع الغاز دول
يلا الكرسى خد الشر وراح .
خدت نفس عميـــق وشهيق وزفير ومسكت اعصابى اللى كانت هتطير منى
وقولت لها ..
طب ايه علاقة السكينة بالكلام ده؟!
قالت لى
لا لا لأ هههه متخافش
انت فاكر ايه
لا انا لو فكرت اموتك فـــ سكينة واحدة لا تكفى
ده هيبقى فيه كل انواع السكاكين والسواطير .
دة انا لو شوفت عينيك زاغت كده ولا كده

هقتلك واعبيك فى اكياس .
كلام فى سركم متعرفش اللى فيها .
دة انا بس عايزاك تساعدنى وتقطع شويه تفاح
على ما احضر عصير للناس
اللى هيجوا يزورونا عشان يباركولنا
قولت لها ده وقته انا عايز انام
فجاة وشها اتقلب والدلع انتهى وبقت واحدة تانية خاالص
يعنى ايه تنام هو انت مش مهتم بيه ولا مسئول معايا فى البيت
مفيش اهتمام !؟ مفيش مسئولية !؟ مش كفاية سبت الناس يكسروا حاجتى ؟!؟كنت فين ياراجل انت
يااااا....اااا..... الخ الخ الخ
وكالعادة الكلام ده اسطوانة محفوظة وتعرض بجميع البيوت الزوجية مجانا
قولت لها خلاص فيه ايه !!
يعنى حبكت تقطيع تفاح دلوقتى وكمان عصير !!
ما انتى عندك حاجة ساقعة وشويه شيكولاته قدميهم للضيوف وخلاص
قالت لى لأ انا مش بخيلة انا لازم اكون كريمة مع الناس
لازم البيت هنا يبقى جاهز من مجاميعه
الناس تقول علينا ايه ؟! مقصرين معاهم.
يعنى ياستى التفاح والعصير هو اللى هيظبط دماغ الناس ويقولوا علينا اهل الكرم والاخلاق
قالت لى انت بتتريق
هو انا كلامى مش عاجبك
؟؟!!؟؟
ده انا عايزة اشرفك ادام الناس ويقولوا عليك راجل بيكرم ضيوفه و مالى مركزك .
يووووة
اسكت يالسانى اكبرى يادماغى
قومت قايم من عالسرير
وقولت لها مش هعمل حاجة
اقولك ياحبى . سيبك من الكلام ده , واعمليلنا كبايتين شاى
انا دماغى صدعت .
قالت لى صدعت ؟!
صدعت من ايه؟
امال انا اعمل ايـــه يااخواتى ؟!اللى فى يوم فرحى الاول بنضف المطبخ من الكسر اللى حصل فيه
ما انت لو كنت واخد بالك مكانش ده حصل .يووووووووووة خلاص ياروح قلبى هجيب لك كرسى تانى مكانه
بس بقى , وقفى الكلام فى الموضوع ده احنا لسه عرسان .كلام فى سركم هديت شويه
وعلى رأى المثل تخانقني في الشارع وتصالحني بشوربة كوارع قالت لى. يعنى مش هنقطع التفاح؟
يادى التفاااح حاضر سيبيه دلوقتى وكمان شويه هنعمله سوا
قالت لى حاضر ياروح قلبى وراحت واخدة السكينة وماشية عالمطبخ انام انا بقى شويه
لقيتها جاية عليه تقولى بقولك ايه ياحبيبى احنا هنسافر امتى نحتفل بشهر العسل وجوازنا؟!
قولت لها تحبى تروحى فين ياحياتى؟ اممممم سيبنى افكر

قولت لها براحتك كلها تلات اربع ايام نستقبل الناس ونطلع نغير جو
ورجعت تانى الرومانسية فى بيتنا المتواضع
ونظرات تعجب بينى وبينها وتبادلنا كلام عن مستقبلنا وامكانية اننا دايما نرفه عن نفسنا
ومحدش فينا يضايق التانى وخدنا الكلام وشربنا اخيراااا الشاى واتكلمنا وتبادلنا حديثنا عن مستقبل جمهوريتنا الديموقراطية فى بيتنا المتواضع وفجأة هوبااااا راحت نايمة تانى !!!!
فجاة عينيها قفلت وسابتنى اكلم نفسى . وانتهت الرومانسية عند هذا الحد
وروحت نايم انا كمان صحينا على المغرب وكنت جعان قوى
يتبع
المصدر: Mohamed Abdelmaksod



[ندعوك للتسجيل في المنتدى أو التعريف بنفسك لمعاينة هذه الصورة] [ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
محمد جلال
مدير
مدير
avatar

ذكر

العمر : 41
عدد الرسائل : 3184
تاريخ التسجيل : 20/08/2008

مُساهمةموضوع: رد: اسبوعيات زوج محتاج خدمة    27/8/2010, 4:09 pm

صحينا على المغرب وكنت جعان قوى
صحيتها قولت لها اومى ياست الحسن المغرب اذن
اعمليلنا حاجة ناكلها من حلة الاتفاق والبشمل المتوفر بشده
قالت لى حاضر ياحبيبى انا برده قولت انك اكيد جعان
ثوانى احضر الاكل
قومت صليت وفجاة سمعت
طاخ تشش طاخ .فيه ايه ياست الحسن .خير
روحت جارى عالمطبخ . لقيت الدنيا بقت كوكتيل من بقايا الاطباق الاركوبال على الارض وبشكل سيفونى جميل
خير ياحبيبتى ايه اللى حصل؟!. قالت لى غصب عنى الاطباق وقعت منى
امم .. حلال عليكى حرام علينا .
خلينا ساكتين احسن بقى .يعنى ايه كلامك ده ؟وضحه!
قولت لها لما الكرسى اتكسر قومتى الدنيا ونغصتى عليه حياتى
ولما انتى كسرتى الاطباق اللى شكلها غالى دى سكتى وكنتى فى هدوء تام
قالت لى ياسلام وهو انا كسرتهم بمزاجى! ده غصب عنى
وظهرت معالم الوحش الكاسر ولسه هتطلع النغمة المعروفة بتاعتها
قولت لها خلاص خلاص
حصل خير المهم انتى كويسة ؟
الحمد لله .
تمام يلا شيليهم وظبتى كده وحضرى الاكل انا مستنيكى .
مستنيكى ؟! ما تيجى تشيل اللى اتكسر ده معايا
هو انت هتسيبنى لوحدى وتروح فين؟
تعاااالى هــنـــا .قولت لها هفتح التلفزيون انا مليش فى الاعمال البيتوتية دى .
قالت لى وقاعد تقولى تعاون واحترام متبادل واحنا الاتنين واحد
قولت لها عادى مفيش كلام بس الحاجات اللى زى الكسر والكلام ده مليش فيه
وروحت سايبها تكمل السيمفونية العكننية الخاصة بها
ورجعت على الليفنج روم وبفتح موبيلى لقيت رسالة من؟ ايه ؟ رقم مين ده!؟ اخخخخ . يانهار ابيض
لو مراتى شافت الرسالة ممكن تقتلتنى ياترى الحوار ده ايه ولو مراتى عرفت هتعمل ايه
انتظرونا فى الحلقة القادمة
بس خلاص

المعلومة القيمة

عرفنا من خلال الزوج ورد فعله ان : من كتم غيظا ولو شاء ان يمضيه امضاه , ملأ الله قلبه رضا
وبالتالى مينفعش الطرفين يشدوا والا هتحصل مشكلة اكبر
مظاهر الجمال فى التعبير
شاهين : هو مصطلح فنى يطلق عن نوع معين من التكاتك التى تحمل حمولة ضخمة
ومن عيوبها انها بتسحب بنزين كتير
الليفنج : كلمة اجنبيه يتناولها عامة الشعب ومعناها الحياة وأصل الكلمة اللغة الشربينيه
روم : بمعنى اودة والاودة فى الشعر الجاهلى كانت ترمز للخيمة وتطورت الخيمة
الى ان اصبحت اودة فى العصر الحالى
بتتريق : يعنى بتهزر او بتستهبل والكلمة يقال ان اصلها روسى وتقال بلغتهم تريقوف
موبيلى : هو جهاز اشعاعى الغرض منه الازعاج وعدم الهروب من اى شخص يزعجك
وللاسف متوفر بجميع دور العرض.
وانتظرونا فى الحلقة التالية فى الاسبوع القادم

المصدر: Mohamed Abdelmaksod


[ندعوك للتسجيل في المنتدى أو التعريف بنفسك لمعاينة هذه الصورة] [ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
 
اسبوعيات زوج محتاج خدمة
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى منارة دشنا :: قسم الأسرة :: منتدى الأسرة-
انتقل الى: