الساعة داخلة على سبعة الصبح انا عايز انام بقى
يعنى ايه ؟يعنى اتخمدى و سيبينى انام حرام عليكى
تنام حتى يوم اجازتك مستخسر تقعد تتكلم معايا شوية
مستخسر ايه ما انتى نيمتى العيال من الساعه 10 و من ساعتها و انتى واكلة ودان امى ارحمينى بقى و نامى
حرام عليك يا مفترى طول الأسبوع من الشغل ده للشغل ده و سايبنى زى الكنبه فى البيت مش لاقيه حد اكلمه و احكيله و افضفض معاه
مش لاقيه حد ايه ؟ امال شرايط المسكن اللى العيال بياخدوها من رغيك كل يوم على الريق دى ايه
انت كمان هاتمنعنى اكلم عيالى امال انا مخلفاهم ليه
مخلفاهم علشان تجيبى لهم الضغط و هما لسه اطفال
مالكش دعوة و اطلع انت منها
حاضر يا ستى هاطلع منها بس سيبينى انام ابوس ايدك
طب حاضر بس استنى احكى لك على سعاد و اللى عملته امبارح مع ابن خالتها اللى كان عايزها تروح مع مراته عند دكتور امراض النسا
طب و انا مالى بسعاد و بعدين سعاد مين
سعاد يا راجل
شفيق يا راجل مين
انت اتجننت يا حمدى باقولك سعاد مش شفيق
يا ولية سعاد مين
سعاد اللى خدت شقة محسن جارنا بعد ما طلق مراته و سافر بره عند اخواته فى الامارات عقبالك زيه يا رب
يا رب عقبال ما اطلقك و اخلص منك
اخص عليك يا حمدى انا قصدى عقبالك لما تسافر
طب خلاص سيبينى انام و اول ما اصحى هادور على عقد عمل على طول
طب اصبر احكى لك حكاية سعاد
يا سهام ابوس رجلك سيبينى اتخمد حرام عليكى
يا راجل عايزة احكى لك علشان تفرح بشطارة مراتك
شطارتك فى ايه هو انتى فالحة فى حاجة الا الرغى
الله يسامحك اصلك مش واخد بالك اصل ابن خالة سعاد مراته حامل و كان عايز يوديها تتابع عند دكتور فانا بقى وقفت لهم و قولت له لأ لازم توديها لدكتورة
طب بارك الله فيكى انام بقى
مش تسألنى انا عرفت ازاى
عرفتى من مطرح ما عرفتى
ده انت راجل تسد النفس مش عايز تاخد و تدى معايا فى الكلام ليه . اصل انا كنت عندهم و بعدين تليفون البت سعاد رن . اسكت دى حاطه حتة رنه تهلك من الضحك ابقى ادينى موبايلك اول ما نصحى و انا اخليها تبعت لك الرنة هاتعجبك قوى واحد بيصوت و ايه ده انت بتستهبل يا حمدى بتعمل نفسك نايم علشان ما اكملكش طب و حياة امى لاكمل الحكاية انا عارفة انك صاحى و بتصيع عليا
و قعدت سهام ترغى بتاع نصف ساعة و حمدى غرقان فى النوم و لما زهقت و اتأكدت انه راح فى غيبوبة شدت البطانية و نامت هى كمان
حمدى يا حمدى يا حمدى قوم يا حبيبى
عايزة ايه يا سهام
قوم علشان تلحق تستحمى و تنزل تصلى الجمعة
هى الساعة كام
الساعه 10 يا حبيبى
هو انتى لحقتى تنامى علشان تصحى
ما انت عارف انا ساعتين نوم بيظبطونى قوم بقى يا حبيبى علشان تلحق تروح الصلاة
حاضر اه يا دماغى
صباح الخير يا بابا
صباح الخير يا ياسمين
مالك يا بابا
الصداع يا بنتى هايفرتك دماغى
طب ثانية واحدة اجيب لك المسكن من اوضة عمرو
عمرو اخوكى بياخد مسكن ليه
اصل ماما كانت بتذاكر له امبارح قبل ما حضرتك تيجى من الشغل و بعدها قعد يعيط من الصداع
معلش يا حبيبتى ربنا معانا و يصبرنا عليها
بس يا بابا لحسن تسمعك
هو انا هاخاف منها و لا ايه
لأ مش هاتخاف بس هاتستلمنى و تقعد تشتكى لى منك و انا بصراحة مش فاضية عندى مذاكرة كتير
ماشى يا سوسة خايفة على نفسك
يا بابا ما انت عارف لما بتفتح فى الكلام ماحدش بيقدر عليها
نزل حمدى يصلى و اتفق مع سمير جاره يتقابلوا على القهوة بعد المغرب
بابا
ايوه يا عمرو
الفواتير بتاعة التليفون نزلت واحد صاحبى شاف لى الفاتورة على النت و قالى
كام ؟ ربنا يستر
فاتورة ايه يا واد دلوقتى مش تستنى يا مزغود بعد الغدا
لأ سيبيه يقول و يسد نفسى
800 جنية يا بابا
يا نهار اسود 800 جنية مرة واحدة
انت بتقول ايه يا واد تلاقى صاحبك شافها غلط
لأ يا ماما هى بتاعتنا الواد شافها على النت و قالى
حقك تجيب لنا النت ده يا حمدى علشان نشوف بعد كده فواتيرنا بنفسنا
نت ايه كمان اللى عايزاه مش كفاية رغيك فى التليفون اجيب لك النت علشان ما تقوميش من على الشات
طب و الله تبقى مصلحة اقلها ارغى براحتى و ببلاش
اخرسى خالص يا سهام مش عايز اسمع صوتك النهاردة تانى
ايوه اتلكك بقى و اعمل زعلان علشان ما تقعدش تتكلم معايا
بابا
عايزة ايه يا ياسمين
حول لى 5 جنية رصيد من معاك
ليه ان شاء الله ما انا لسه شاحن لك موبايلك من اسبوع بخمسين جنية
خلصوا
بترغى مع مين يا هانم و تخلصى عليه الرصيد
يا بابا و الله ما انا دى ماما اللى مسكته اول امبارح خلصت على الرصيد كله
تانى ماما هو انا هاضيع مرتبى كله على رغيك يا ست هانم
حرام عليك انت شايلنى على دماغك و زاعق ليه ما اتطمنش على اصحابى مش كفاية قاعدة فى البيت زى قرد قطع علشان اخلى بالى من عيالك
بتطمنى عليهم بـ 800 جنية فاتورة تليفون و بكارتين شحن كل اسبوع كنتى روحتى لهم ارخص و اوفر
اتغدوا و نزل حمدى على القهوة زى ما اتفق مع سمير
خلاص يا ابو سمره دماغى هاتولع من الولية دى
لسه بترغى برضه
هى بتبطل دى هاتجننى تصدق بالله انا اسعد ايام قضيتها فى حياتى لما جالها برد و صوتها اتحاش
طبعا كنت عايش ملك
طبعا هى صحيح خلصت اجندتين كانت بتكتب لنا فيهم بدل الكلام بس كانوا اسعد 4 ايام قضيناهم انا و العيال
على فكرة انا اسف انى حلفت على مراتى ما تدخلهاش عندنا تانى
هو انت اول واحد يعمل كده
و الله العظيم غصب عنى بس هى كانت بتطلع عندنا من اول اليوم و ما اعرفش بتصحى تخلص حاجتها امتى و بنلاقيها عندنا من اول النهار
اصلها بتنام ساعتين تلاتة بالكتير
و الله العظيم نجوى ما كانت بتلحق تعمل غدا و لا تذاكر للعيال و كانت خايفة تكسفها لحد ما حلفت عليها بالطلاق ما هى داخلة عندنا تانى . انا مش عايزك تزعل منى يا حمدى
لا عادى و لا يهمك
قاعدين بيدردشوا لقوا واحد داخل عليهم
السلام عليكم
و عليكم السلام و رحمة الله و بركاتة
حضرتك استاذ حمدى
ايوه مين حضرتك
انا عبد الله جاركم
معلش مش واخد بالى
عبد الله الساكن الجديد جوز سعاد صاحبة المدام بتاعة حضرتك
اه اهلا و سهلا اتفضل
معلش يا استاذ حمدى كنت هاطلب من حضرتك طلب رخم
اتفضل
قول للولية مراتك انى مش عايز اشوف وشها فى شقتى تانى يا اما هانزلها لك حتت من بير السلم
استهدى بالله يا استاذ عبد الله فى ايه بس
فيه ان الست مراته ما ورهاش حاجة غيرنا كل يوم عندنا و سعاد بنت ناس و مش عارفة تطردها و تقولها تحل عن قفانا
حقك عليا انا يا استاذ عبد الله
لا حق و لا باطل بس انا باتكلم لحد دلوقتى بالعقل بعد كده ما اعرفش هاعمل ايه و بعدين دى سعاد راحت تقعد عند امى فى المستشفى علشان الست تعبانة تقوم مراتك تقعد تكلمها فى الموبايل لحد ما فصل شحن و بعد كده استلمت التليفون الأرضى من صباحة ربنا لحد بالليل هو فى ايه بالظبط و كل ما تقولها مشغولة تقفل و نص ساعه و ترجع تتكلم تانى هو مافيش احساس خالص ناس ما عندهاش دم
و سابهم و مشى
شايف الفضايح اللى عاملاها لى
معلش استحمل علشان العيال
قايمين مروحين لقوا حريقة فى العمارة اللى قصادهم طلعوا يجروا يطفوا سمعوا الست بتقول لجوزها
و الله كنت باكلم ام عمرو اللى فى العمارة اللى قصادنا و نسيت الاكل على النار
الله يقطع ام عمرو و سنين ام عمرو ربنا ياخدها علشان نستريح منها و من رغيها مادام مالهاش راجل يلمها و يخليها تتكن فى بيتها و تبطل رغى . انا عارف جوزها ده ايه اللى سايبها مقطوعه للبلكونات و للرغى
سمير بص لحمدى و هو مكسوف و نزلوا جرى لحسن الراجل يضربهم
دخل حمدى البيت لقى التليفون فى ايدها راح شادد من ايدها السماعة و شد سلك التليفون قطعه
قومى
انت اتجننت بتقطع سلك التليفون ليه ؟
باقولك قومى
هانروح فين
هانروح لدكتور امراض نفسية
ليه هو انا مجنونة
ايوه و لازم تتعالجى انا خلاص زهقت من رغيك حرام عليكى يا شيخة فاضحانى فى كل حته
حرام عليك بطل افترا عليا
افترا طب بصى بقى يا سهام علشان نجيب اخرها عليا الطلاق بالتلاته لو عرفت انك مسكتى موبايل و لا حاولتى تصلحى التليفون و لا روحتى عند جاره و لا وقفتى فى البلكونة تبقى متحرمة عليا
انت اتجننت
ايوه اتجننت و لو عايزة تطلقى منى اعملى اللى قولت لك عليه ده
طب افرض بقى الجيران هما اللى جولى اطردهم يعنى
لأ اللى يجيلك هو حر بقى و ذنبه على جنبه لكن انتى ما تعتبيش بيت حد تانى
حاضر
حمدى راح الشغل تانى يوم و رجع لقى الشارع كله ملموم تحت بلكونته و فيه مايك متعلق فى البلكونه و سهام من جوه الشقة بتهتف
لكل ست فاضية متطلقة بقى ارملة و حتى لو كنتى متجوزة و جوزك مش فاضى لك
تعالى لى فى اى وقت انا قاعدة فاضية
يالا يا ست انتى و هى و هى
يالا يا رشا انتى و فله
تعالى و لمى كل الشلة
هانرغى امال هانلعب سلة
هانرغى ده احنا كلامنا فله
هانرغى بدل ما نشم الكوله
هانرغى سامعه يا سعاد يا مراة عبد الله
هانرغى ده الرغى موهبة مش عله
هانرغى و نطبل كمان على الحلههارغى حتى لو هاخد على دماغى قله
موضوع: الرغــَّـــايـــة 
7/12/2009, 2:38 am
