ساعة العصارى

ساعة العصارى
قعدة الكشك
تحلالهم وتحلالى
ناس تبيع وناس تشترى
والسندباد يسجل
والدفاتر بالليل تنقري

ولو يوم زعلت السندباد
وكنت ليه مديون
حكايتك تتنشر فالبلاد
وينادى عليها بالميكرفون
هو طيب ودايما يحب يلغيك
وبأحلى كلام يشكر فيك
بس لو زعلته
تستاهل اللى يقولوا عليك

عند الكشك ساعة العصارى
لو عدى واحد لابس عبايه
ومعطر الهدومات
اللى يقول لو شاف أبوه
العباية مكنش مات
واللى يقول
لابس وكاوى والجيب فاضى
لا ملاليم ولا جنهات

عند الكشك ساعة العصارى
مبسم الشيشة على البق شغال
والسندباد عل الودان مش بطال
عم فتوح أتجوز على مراته
وابو سيد طلق ام العيال

عند الكشك ساعة العصارى
ياجى الشاويش يحكى على الجيش
واللي حصل فيه قتل من الميه تسعين
والباقى دفنه برجليه
والكل يسمع والودان مفتوحه
صح ـ حقيقي ـ يصدق
والدعوة للجميع مفتوحه
والمعاد عند الكشك ساعة العصارى
أصل القعدة
حتحللاكم وكمان حتحلالى

بسم الله الرحمن الرحيم




الى اخى اللورد امام



جميل .... ان ذكرتنتا بساعة العصارى

حتى البيوت كان فيها شاى العصارى


سرد جميل للحظة مر بها الجميع

وصف جميل كمان للمجرور والدكان

وكتير من الدفاتر فى العصارى تنقرى


الحكى والحكايات والسقا اللى مات

وبهية وبهانة وفتحية وقدرية

والنبى ... فكرتنا باللى فات

مشتاقين للعصارى والحكى والحكايات

مشكور ونرغب فى المزيد

تقبلنى

اخوك

عبدالباسط عبدالستار

لورد....بسم الله ماشاء الله

ايه الجمال ده

كان فيه واحد كفيف البصر

لكن عنده تلاقي اي خبر

من كل اللي اتقال واتنشر

عارف الخبر بيجيله منين؟؟

مع انه ملوش غير ودنين

من قعده المصطبه والسهاري

ولمة الناس ساعة العصاري

.........................

شكرا لورد

استاذتى واخوانى
أ/ عبدالباسط - أ / سعيد أ / عبدلفتاح
اسعدنى جدا كلامكم
و ما كلماتى ماهى الا محاولات بخطى صغيره فى نهج طريقكم واتمنى دائما ان تنال كريم مباركتكم
وان اسعد بارشادكم ومحبتكم

دمتم بود ومحبة وسعادة