يا عم يا بتاع البطاطين
بردانين
ميتين من الخوف
والبرد بينا بيتسلى
و الشكوى لغير الله مذله
...يا ترى لسه فيه بطانيه من غزل المحله
تقدر تغطي جراحنا العريانين
مش شرط صوف
مش مهم الالوان
ما عدش الشتا يومين ويعدوا
مبقاش طيب زي زمــــــــــــــــــــان
لا دفايه ستي ولا اللمه ولا الغناء ولا الحواديت
ولا الدفا اللي كان واصل لقفص الكتاكيت
مفيش فالشتا غير عفاريت
بتسرق الستر من البيوت وتكسر علينا البيبان
يا عم هو انت مش زينا بردان
ولا انت كمان من أصحاب الجلد السميك
عارف............... كل بطاطين العالم مش هتدفيك
طول ما الوطن بردااااااااااان
موضوع: يا عم يا بتاع البطاطين 
4/3/2011, 2:04 am
