عندما تضطر ان تختار بين اهلك وبين من تحب من تختار؟؟

السلام عليكم أخواني ....... ربما يكون الموضوع نطرح من قبل أو تردد كتير لكن انا بتمنى تشاركوني آرائكم ........ لو انك نوضعت بهذا موقف أنت عاشق لحد الجنون والتزمت للانسانة الي ملكت مشاعرك واحاسيسك ووعدتها إنك مارح تتخلا عنها مهما كانت الظروف وبنفس الوقت انسان ملتزم لاهلك الي اوصاك فيهم ربك والزمك بطاعتهم الا في الكفر لكنهم لم يقبلو بمن احببت ورفضوها رفضا مطلقا
و خيروك اما هم او من تحب ....... كيف ستتصرف ولكم جزيل الشكر

السلام عليكم

طبعا العاقل حايختار أهله لانهم مايتعوضوش أبدا أما المشاعر والأحاسيس فدى بالذات بتتعوض كويس أوى
بس تعال نتكلم شوية فى الخطوة دى
يعنى مفهوم الأهل هنا تقصد مين بالظبط
القرايب بالدرجة الأولى زى الأب والأم والأخوات واللى هما متخوفين بالفطرة من دخول واحدة غريبة فى العيلة على أعتبار أنها حاتلعب فى صواميل مخه وتخليه ينسى أهله
ولاقرايب الدرجة التانية زى العم والخال والخالة واللى كل واحد فيهم له غرض انك تتجوز بنته على أعتبار أنه فى واحدة جاهزة فى العيلة يبقى نستورد ونجيب من برا ليه تكلفنا الشئ الفلانى وتؤمر وتتشرط ماهو البنت موجودة ولو عايشتها فى أوضة فى بيت العيلة حاتعيش مش بس كدا دانت لو أكلتها ملح حاتبوس أيدك ورجلك مش مهم المشاعر دوس عليها ولا يمكن يقولولك اتجوز بنتنا وروح أتجوز اللى أنت عايزها ماهو بنتنا مش حاتاكلها ولاحاتكل أكلها دى فى أوضة ودى فى أوضة ماهو الراجل مايعيبهوش إلا جيبه
ولا يمكن تقصد قرايب الدرجة الثالثة بنت العمة وبنت الخالة ماهم دول كمان لهم رأى ولا أيه وخصوصصصصصا لو كانت واحدة منهم مرات أخوك وعايشة فى نفس البيت تيقى اللى جاية دى نهارها أسود من قرن الخروب
خد عندك يفضلو يكرهوك فيها لغاية متطفش منها دى وحشة ودمها تقيل لا دى مغرورة ومتكبرة دى متنفعش معانا أصلها متعلمة زيادة وبتشتغل طيب مين حايخدم معانا فى البيت
ويسلام لوتسيبها وتاخد أختها النسمة ولا بنت خلتهم الرقيقة دى اللى تنفع واللى عليها العين ياسيدى بكرة تحبها دى من صغرها بتموت فيك ويمكن تنتحر سيبك من التانية المهم أحنا عايزين مين فى البيت مش مهم خالص أنت عايز أيه؟؟؟؟؟؟؟؟؟؟؟
سؤالك كان عن رفض الأهل لحبيبتك
طيب خد أنت السؤال دا عندك وجاوب
أيه رأيك فى الأهل اللى يطاوعو أبنهم ويدخلو فعلا بيوت الناس ويرتبطو رسمى ويحددو ميعاد فرح ويفضلو طوال السنة أو السنة والنصف وهما يعملو فى مكايد بطرق خسيسة وغير شريفة ولا أخلاقية علشان يكره البنت ويبعد عنها وبكل بساطة يضحى بيها يعنى من الأخروبالبلدى أخدو على قد عقله زى الطفل الصغير لغاية مايكرهوه فيها ويبعدوه عنها وهى مش مهم كما لوكانت مش بنت ناس ولا ليها مشاعر وأحساس لاحتى عملو أعتبار لأهلها قدام الناس
عادددددددددى
ماهو مصيرها حاتتجوز أى واحد ياعم فكك المهم انه حاياخد بنتنا واللى أحنا عايزينه تم
وتوتة توتة خلصت الحدودة
يبقى من الأول تسمع كلام أهلك وتاخد اللى هما عايزينها بلاش تبهدلو بنات الناس وتعشموهم بالجواز والسعادة والحب
اللى أحنا بس بنشوفه فى الافلام العربى والهندى
خلينا واقعيين شوية
تروح لأهلك ولعمامك وخلاتك وأولادهم طبعا
وتقوللهم أنتو عايزين مين نتجوزها كلنا
علشان بس نبقى كلنا عايشين سعداءفى هذا الزمن الكئيب التعيس
خالص ودى وأحترامى
أتمنى أكون نقلت جزء بسيط من واقع الحياة المصرية واللى %90مننا عاش السناريو بكل تفاصيله الدقيقة وبنفس النهاية
ليا رجاء بسيط : ياريت ياريت لو أنتو مش قد أنكو توفو بالوعد بلاش توعدو بنات الناس طالما واثقين أن أهلكم رافضين يبقى ليه من الأول تدمرو حياة أنسانة وثقت فيكم صدقنى مش ممكن توافق أن أختك أقرب الناس لقلبك أن واحد مهما كانت مشاعره صادقة فى البداية أنه يدمرها ويدوس على مشاعرها ويكسر قلبها لانه ببساطة الدنيا مش قادر ياخد قرارويتمسك بيها
لانه بدل مايقنع أهله بيها ويتمسك بحبه قرر الهزيمة والانسحاب أسهل الطرق لراحة دماغه وان دل على ضعف الشخصية وسامحونى لو طولت عليكو وسامحونى أكتر على أسلوبى مع العلم لازم تتأكدو كلكم وتكونو واثقين أنى مش بأدعو لعقوق الوالدين ولا أنك تجبرهم على أمر هما رافضينه ربنا يعلم أنى قصدى واضح وهو أننا نعرف الأسباب ونقرب الأطراف من يعض للوصول لهدف واحد أن البنت اللى انتى عايزها بالظبط زى أختك حايجى واحد ويكون برضه عايزها وأهله يرفضوها يعنى دايرة على الكل وكأس الكل شاربه
المهم ان الانسان يتقى االله
أصدق التحايا

مشكورة الاخت نفرتيتى على تجاوبك فى الموضوع وتوضيحك الذى يدل على عقليتك الجيدة فى طريقة طرحك وتناولك للموضوع وفى انتظار مداخلات اخرى حتى تتوضح الصورة بشكل افضل وسوف اعلق اخرالموضوع حتى نصل الى بر ونخرج بفائدة

شرفنى مرورك اخى على عبدالله وتعليقك مهم لنا ونعم الاخت اجتهدت بشكل جيد فى الموضوع
ولكن هناك كلام كثير فى الموضوع وفى انتظار مداخلات اخرى