عبقرينوووو المنارة واستجواب رمضانى

السلام عليكم ورحمة الله
اعتذارات افندم علي التأخير
معلش حقكم عليا النت عندي ضعيف وبعافيه النهارده ههههه
انا جاهز معاكم وطلب الاستاذ علي عبدالله ايه رأيكم نخليه في اخر الحوار ولا ايه ؟؟؟
الحكم ليكم

يا استاذ/ اسامه

انت تشرف في اي وقت

بقصب او بدون قصب

كفايه بس قعدتك معانا

وطلتك علينا

ووالله ياود ابوي اليومين دول

مابقدر امص القصب....السن والسنان والضروس

ماعادت تتحمل....والعيال مش مشكله

الغيط قريب علينا وعما يروحوا بنفسهم لما نفسهم تهف

علي القصب....والف سلامه علي الحمارة...واللي راكبها

ولا تتعب حالك ياود ابوي

انا اختك الكبيره ومسمحاك من البير للبحر الكبير ههههههه

يامية مسا

ياباشا اللي تشوفه

احنا كلنا معاك

وكلنا اذان صاغيه

بس متنساش الصوره

ربنا مايحرمني منك ولامن الاخوه الكرام اللي شرفوا الحوار وزادوه تألق وبريق
وايه ياعمنا الحلاوه دي كلها انا كده هاكل الاكل من الضيوف ههههه اصله بصراحه يشجع جدا وشكله لذيذ للغايه
اتفضلوا اللي عنده سؤال يطرحه لحد ماتيجي المحاورة بتاعتنا نستغل الفرصه للهرب من اسئلتها الجامده شويه هههه ونعمل رست
والصورة نخليها في الاخر ربنا مايوريكم حاجه وحشه هههههههه
علشان المفاجأت تكتمل

خايف من ايه يا عبقرينو

عموما انا جيت خلاص

وس/وقفنا عند نقطة تعلم التدخين من سن صغيره
بمعنى ان الصحبة لها دور فى تعلم هذه العادات السيئة
وبما انك اب لاخوتك
خوفت عليهم من هذه التجربة ؟

ج/
نعم كنت ومازلت اخاف عليهم من اتباع هذه العاده السيئة واحرص تماماً علي عدم ارسال اي منهم الي الدكان او كشك سجاير علشان يجيب لي علبة السجاير
بروح بنفسي اجيبها لاني شايف لو عودتهم انهم يشترو ليا الشيئ دا هما كمان ممكن في قرارة نفسهم يحاولوا التجربه وهتبقي بالنسبه ليهم في المرحله دي شيئ من حب الاستطلاع
هيقول وايه يعني لما اجرب وبصراحه مش عاوزهم يكونوا زي اخوهم الكبير في العاده دي
بس الحمد لله ربنا اكرمني فيهم الاولاد الاتنين في مراحل تعليمية كويسه واحد 2 ثانويه ازهريه والتاني 3 شريعه وقانون والحمد لله انهم عارفين مدي خطورة التدخين وسلبياته التعليم دلوقتي يا ام شروق بقي كويس جدا بينصح الطلبه ويحثهم علي عدم اتباع العادات السيئه واللي منهم بيدخن بالفعل بقدر الامكان بيحاولوا يخلوه يقلع عن العاده دي
المشكله كلها اني الوالد عندي غير مدخن بالمره لاي شيئ من انواع الدخان ولاحتي الشاي بيشربه ههههه
حياته كلها سوائل بمختلف انواعها ولاحتي اعمامي والله كلهم غير مدخنين ماعدا خال ليا هو نسيبي برضوا في نفس الوقت بيدخن بس بطريقه الصعايده المدغه لو سمعتي عنها هههههههه ودي بصراحه حاجه متتوصفش انا وهو الفشله اللي في العيله ومش عاوزين نتوب بس اهو بنقول يارب وبنحاول

اعتقد ان الاخت زهره مش عارفه يعنى ايه مضغه

تسمحلى احتل دور الزهره حتى تعود

مين الانسان الى انته ظلمته بجد ونفسك تقوله سامحنى

حماده شحات هل هو راض عما وصل اليه الان

حبيبي الغالي وابو شريكو ابوعدلي
لن اخفيك شيئ وسأصدقك القول الشخص الذي ظلمته طيله حياتي هو نفسي عندما تراخيت في الاجتهاد والمذاكره في مرحلة الثانويه العامة وكانت النتيجه هي حصولي علي تقدير مقبول
في تلك المرحله لم يبخل علي الوالد بشئ من اموال من راحه نفسيه من ترتيب جو هادئ ..... الخ وكان امله في الدنيا اني اجيب مجموع كويس علي مدار المرحله الثانويه كلها لانه كان بيتوسم في الخير فالحمدلله وحده منذ الصغر وجميع معلميني واساتذتي كانوا يتنبؤا لي بمستقبل جيد منذ الابتدائيه ولكن خاب ظنهم في النهايه ههههه وظلمت استاذي الكبير الاستاذ ابو العلا كان احد مدرسيني في المرحله الابتدائيه وكان يحنوا عليا حنان الاب لابنه وكانت لي معه معامله خاصه جدا كنت اشعر معه اني ابنه الذي لم يأتي من صلبه هو الاب الروحي بحق فلم يبخل عليا بشيئ اقسم بالله وظلمي له اني تركته لفترات طويله جدا وحتي عندما اقوم بزيارة البلد نادراً ما ازورة وهنا كان التقصير مني للاستاذ والاب الروحي الذي تعلمت منه الكثير جدا فكان مدرس للغه العربيه التي اعشقها عشق الجنون
والله يا ابوعدلي انت خليتني حزنت واعترف بتقصيري معاه وافتكرته بس التقصير دا بيخليني اخجل من نفسي والله
واتمني ان يكون هناك وسيلة اتصال حتي اكفر له عن مابدر مني في تهاوني في الاتصال والاطمئنان عليه
واقبل يداه ورأسه واقف امامه واطلب منه السماح بحق جرم اقترفته في تقصيري معه
موضوع اني راضي عن ماوصلت اليه الان
اقولها وبصدق اللهم لك الحمد علي ماشئت بالنسبه للعمل والحياه الاسريه التي لها جولات وصولات ايضاً ههههه
ولكن تقصيري ايضا في ظلم نفسي هوفترة الابتعاد عن الصلاة ظلمت نفسي فيها لابعد الحدود وندمان بشده علي مافاتني والله بس بقول الحمد لله وربنا يقبل التوبه يادرش
ونفسي اقول للوالد حقك عليا خيبت ظنك سامحني يا اغلي الناس

خلينا نستغل فرصة غياب الزهره ونسال

ابو حسام

من خلال ملفك الشخصي بالمناره

انت درست الهندسه المعماريه

هل كان ذلك برغية منك؟

ام كان برغبة الوالد حيث جاء في اقوالك السابقه

انه يعمل في مجال المعمار والعقارات ؟؟؟

ام لا هذا ولا ذاك بل التنسيق

هو من ارسل بك للهندسة؟؟؟؟

علشان ما حدش يقول عليا بخيله
علشان تقدروا تكملوا الحوار
[ندعوك للتسجيل في المنتدى أو التعريف بنفسك لمعاينة هذه الصورة]

لا كانت رغبتي انا الشخصيه لاني بصدق اشتغلت مع الوالد في مجال المعمار وهناك في مرسي مطروح قابلت مهندس يدعي سيد عبدالحميد لاانسي هذا الاسم طيله حياتي كان شخص اكثر من رائع وكنت اعمل معه كمساعد بالبلدي اتمرمط معاه ههههههه
بس بصراحه شديده جدا اتعلمت منه الكتير كنت لبق الكلام معاه وبحبه وهو كمان كان بيحب الوالد جدا وتربطهم صداقه قويه جدا وتجمعوا كثيراً في المنزل عندنا او المنزل عنده وكانت زيارات عائليه متبادله بينهم
واحنا طبعاً معاهم في كل مكان المهم المهندس دا كان راجل علي خلق متدين جميل المشاعر كنت انظر اليه وهو يعمل وهو بيرسم ويشوف المواقع ويباشر عمله كانت له شخصيه قويه جدا برغم طيبته له هيبه كدا سبحان الله تهابه من علي بعد ولكن عندما تقترب منه تجده ابسط مما تتصور من هنا بدأت اتجه الي دراسه الهندسه ونويت عليها كنت ساعتها في 3 ثانوي بتعاقب بعد النتيجه الجميله اللي جبتها هههههه اني اشتغل مع الوالد تكفيراً عن الجريمة اللي ارتكبتها
بس ارجع واقول كل شيئ بيدي الله لانه مقسمها اني اجيب التقدير الجميل مقبول واتعاقب واروح اشتغل واقابله هنا واكون جنبه عن قرب واتعلم منه بدون هو مايدري طبعا كانت عمليه التعليم دي في الخباثه هههههه
اشوفه بيعمل ايه وافضل ازن عليه دي ايه وي ايه ؟
وهو مبخلش عليا والله بس مكانش حاطط في باله اني ناوي علي حاجه كان مفكر الموضوع عادي بس علي مين هههههه
فضلت وراه لحد معرفت القواعد الاساسيه واللي خلاني احب الهندسه اكتر شخصيته قولت في عقل بالي ياسلام ياواد ياحماده لو تكون مهندس كدا محترم وترسم وتخطط وتعمل شغل عالي هههههه
وربنا سبحانه وتعالي اراد بالفعل والتقدير كان كويس
ومكتب التنسيق عمل معايا واجب ووداني هندسه عين شمس
والحمد لله اشتغلت في شركه استثماريه كويسه بالكوسه طبعاً والواسطه والمحسوبيه من حبايب الوالد
وعليه اللهم لك الحمد اجتهدت وبقيت يعني مهندس معقول مش بطال بعرف ارسم سلالم هههه

شكراً ام شروق علي دور الواجب العالي ده نردهالك في فرح شروق يارب وتعزمينا
والفرقه بتاعت الطبل البلدي عليا منا متخصص هههههه

متخصص هندسه ولا متخصص طبل بلدى
ارسى لك على بر

سيبك انت
انت شخصيه ممتازه يا عبقرينووو بتقدر يعنى ايه مسؤلية

....
س/ فى مرحلة الجامعة والانتقال من مرحلة الى مرحله اكبر وعالم مفتوح
فيه الكويس والوحش
هل جاء عليك يوم فقدت ثقتك فى نفسك ولو للحظات وقلت مش حاكمل؟

ج/
انا بقولكم عماله ليا كمين شرطه هههههه
جات اللحظه دي فعلا واتكررت اكتر من مرة فقدت الثقه في نفسي في اول سنه ليا
اتعرفت علي ناس غير اللي عرفتهم في حياتي عالم رايقه جدا جدا ومعندهاش مشاكل اصلا كل حياتهم بابي ومامي هيجيبوا ليا عربيه علشان اروح بيها الجامعه بابي ومامي هيجيبو ليا الدكتور بتاع الماده الفلانيه يديني درس في الماده بتاعته في الفيلا
قلت في عقل بالي وانت هتعمل ايه ياموكوس بين الناس دي لو قلت لابويا هاتلي عجله هيضربني بال...... هو مش بخل ولاحاجه بس العقل بيقول كدا والمبالغ دي هيجبها من فين احنا العيشه متوسطه والحمد لله وفي غيري لسه مش لوحدي تقريباً ساعتها ابويا مكانش يعرف او يسمع عن حاجه اسمها تنظيم الاسرة عمال يجيب في عيال والسلام
المهم الايام دي فعلا ضعفت لما كل واحد ابوه هيجيب له الدكتور او المدرس في البيت احنا مين هيشرح لينا ولو بالفعل حضر الدكتور في السكشن والقي المحاضره هل هو هيقولها زي ماشرحها للعالم دي في بيوتها ؟
الشك بصراحه ملاء عقلي وقلت ياواد خدها من قصيرها وانس الهندسه دي وحول لاي كليه تانيه انشالله فنون جميله واهو كله رسم والسلام بعد كدا اتكلمت مع الوالد في الحكايه دي وطرحت عليه الموضوع وقلتله انا مش هقدر كل شويه اطلب مبالغ كبيرة غير المصاريف والمواصلات والمصاريف الشخصيه والمراجع والكتب .... الخ
رد عليا بجمله جميله جدا قال بص اعمل الي عليك وسلمها لله والفلوس متشيلش همها بس يابني الي يبص لغيره يتعب
انا مكدبتش خبر وقلت العقل فين ؟؟ لازم اعمل حاجه واكفر عن المصيبه اللي عملتها قبل كدا واطلع راجل معاه وعلي الاقل احاول وزي ماتيجي تيجي
المرة التانيه كانت في السنه الاخيره عندما اتعرفت علي بنت وارتبط بيها عاطفياً زي الشباب بقي لازم اقتبس منهم حاجه
وكالعاده والافلام المصريه الابيض واسود البنت عاوزه الموضوع بتاع الجواز يتم في اسرع وقت وانا في الايام دي كنت واهم اني مرتبط بيها فعلا طيب يابنت الحلال منين لسه مفيش شغل لسه فيه دراسه لسه في جيش لسه لسه لحد ماريقي نشف وهنا كان الانفصال بقيت اروح الكليه واشوفها ارجع تاني والله منا مكمل اليوم واطلع الف برا الكليه لحد المواعيد متيجي بتاعت النهايه من المحاضرات فضلت علي الحال ده حوالي شهر وبرضوا رجعت فكرت اني اسيب الكليه وارتاح علشان وجع الدماغ ولقيتها نفس الشيئ مع شخص تاني والامور عادي جدا واتفقوا علي الجواز وكأني نكره مكنتش موجود هههههههه ولا ليا اي اثر حتي بعد عشرة مش كبيرة اوي المهم قولت لالا الحكايه كده خربانه كمل واتراعي ياواد لاهلك اللي طلع عنيهم علشان تبقي حاجه متضيعش تعب السنين علشان واحده ..؟
وفي كتير بس هما دول اكتر مرتين كنت ضعفت فيهم بجد وقلت اترك الهندسه

رائع بكل المقاييس
فى صدقك وعفويتك

وفجرت مشكله كتيييير بيمر بيها
ومش بيطبق الحكمة اللى قالها الوالد

الي يبص لغيره يتعب

ودى حكمة لا ينبغى ان نغفل عنها
لا نحن ولا ابنائنا
تحية طيبة للوالد العظيم الحكيم

توصل التحيه بأمر الله من ام شروق للوالد وتقبلي وافر التحيه
انا اسف ياجماعه والله علي طريقتي في الكلام بس مبحبش التكليف
الامور لازم تكون واضحه وبطبيعتها طالما بتكلم مع اهلي واسرتي
اقبلوا الاعتذار

على ماذا تعتذر
وهل يعتذر هذه الايام عن الصدق والتلقائية والشفافية
واصل كلامك يا عبقرينوو براحتك

واحكى لنا عن يوم تمنيت ان يحذف من حياتك بتاتا؟

الصراحه والوضوح سمه من سمات الشخصيه

السويه للانسان علي مر العصور

ونلاحظ ذلك من خلال اجاباتك ياعبقرينووووو

البساطه والتلقائيه في الاجابات وبدون تكليف

وهذا يقودني الي سؤالك

بعيدا عن الوالد والمعلم في المدرسه

من مثلك الاعلي قي الحياه

وهل تطبق علي نفسك قيمه ومفاهيمه في حياتك؟؟؟

طبعا بعد متجاوب علي الزهرة

عبقرينو المنارة
ابو حسام
لقد فاتني الكثير في هذا الحوار الممتع والجزاب ولكن انت تعرف الظروف
كما توقعتك بالظبط بسيط ومرح وواضح وصريح وكل الصفات الجميلة التي يمكن ان يوصف بها انسان جميل مثلك
والله اني احبك في الله حبا جما فواصل الحوار كلنا ازان صاغية
وسلملي علي الاستاز عبد الفتاح والاخت زهرة وكل الصحبة الحلوة

ج/
للزهرة السيدات اولا ياصقر المنارة لان ردي علي سؤالك هيطول شويه
بصي يازهرة المنارة هو ممكن اطمع بدال يوم يكونوا ايام ؟؟؟
بجد والله في ايام كتير اتمنيت وبتمني اني انساها وتتحذف من حياتي
اكتر ايام اتمنيت انها تتحذف خالص من حياتي فترة استمرت لحوالي 34يوم تقريباً اتعرضت فيها للظلم في شيئ ماليش اي علاقه بيه نهائياً ومرة واحده لقيت نفسي محطوط في خانه اليك زي مابيقولو وعلي ايه معرفش وايه السبب برضو معرفش احاس الظلم اغبي شيئ ممكن الواحد يحس بيه لو فضلت اوصف لبعد 100 سنه لايمكن ان اوصفه زي ما عشته تعرض الشخص منا للظلم في شيئ هو بعيد عنه يااااااااااااااااااااه واه من حرقة الاه علي رأي ام كلثوم بس مع اختلاف المواضيع طبعا الايام دي بجد اتمنيت انها تتحذف من حياتي عارفه الانسان امتي يعرف ربنا سبحانه وتعالي اوي ويحس انه ولا اي شيئ الا مجرد نفس خارج وداخل وخلاص ؟
هي الايام دي لما تكوني في محنه ومحنه صعبه بجد بس الايام دي برغم اني اتمني انها تحذف الا انها بها اشياء جميله في قرارة نفسي اني لجأت الي الله ودا كان اول شيبئ انا عملته وفضلت اقول يارب بحرقه ودموع بتنزل والله غصب عني لقيت نفسي ضعت ومن غير ذنب معلش انا مش هذكر تفاصيل اعذروني بس قسماً بالله في الايام دي ايقنت تمام اليقين ان الانسان ولا اي شيئ وان المولي عز وجل بيده كل شيئ في لحظه تتغير مجري الامور وتظهر الحقيقه وعرفت قيمة الكلمه اللي بتقول ربك مع المظلوم وان دعوة المظلوم مفيش بينها وبين اللي خلقها حجاب فعلا عرفت معني الحديث القدسي اللي بيقول ربنا حرم علي نفسه الظلم اتعلمت في الفترة دي حجات كتيرة جدا جدا جدا عرفت معادن ناس كانت تايهه عني وايقنت ايضا المثل اللي بيقول تعرف فلان قال ايوه قال عاشرته قال لا قاله يبقي متعرفهوش
المهم يوم تاني عاوزة يتحذف من حياتي نهائياً هو يوم فقدت فيه الجد للاب لاني كنت مرتبط بيه جدا وكان مربيني وتحديداً يوم 22/3/2001 اليوم دا عاوزة يتحذف مش علشان وفاة جدي لا انا مؤمن بأراده الله لكن علشان انا بصراحه كنت طايش ومش عارف انا بعمل ايه وقلت كلام ولعياذ بالله ومش عاوز افتكرة اللهم لا اسألك رد القضاء ولكني اسألك اللطف فيه

واجب تحيه وتقدير علشان عم الشباب والرياضه اللي جه وشرف الحوار ونورنا
كله يقف ويقدم التحيه بس ياعمنا المشاريب علي زهرة ههههههههههه
انا مجرد ضيف
وربنا يكرمك وانا كمان والله بحبك جدا لله في لله
وبحس انك قريب مني جداً

ج/
عمي وحبيبي صقر المنارة الاصيل
مثلي الاعلي في الحياه جدي للام راجل بسيط جدا ولايعرف الكتابه ولا القرأه لكن لديه من العلم مايكفي بلاد متدين لدرجه لايعلمها الا الله بالبلدي كده شيخ في حاله مسالم عنده خبره في الحياه والدنيا الغرورة مقدرش اوصفها يحفظ اكثر من عشرون جزءاً من كتاب الله
احب فيه البساطه الروح المرحه الحنونه التي يظي بها جميع افراد الاسره
تطبيق القيم والمفاهيم في حياته انا بحاول بقدر المستطاع انفذه بس مقدرش اقول اني عملت كدا لا بقول بحاول اتمتع بالروح الطيبه الخفيفه المرحه بالبلدي مش واخد الدنيا علي صدري وزاعق لا الامور كلها بحاول اخدها كدا بسهوله لاني لوخدتها علي اعصابي هفرقع ههههه هو اللي علمني كده لازم اكون بسيط
مفاهيمه ؟
هي صعبه شويه في الزمن الحالي لانه ليه قواعد بيمشي عليها ابسطها
1- لو حد زعلك سيبوه متردش عليه وحاول انك تصلح الامور بهدوء
بس بالنسبه ليا في احوال تعفرت العفريت مقدرش اسكت عليها
2- اخد الحق حرفه وفن وادب
ماشي ياسيدي بس فيه ناس مينفعش معاها الادب ومش هينفع تسيب حقك هيتقال عليك ضعيف
3-حياتك كلها عباده حتي في العمل
مقلناش حاجه بس الظروف بتجبر الواحد ياجدي انه ممكن يكون غصب عنه وميقدرش يصلي الفرض في وقته وفيالعمل في ناس بتحبب تتلكك وتمسك ليك علي الواحده وانك واخد الصلاة حجه وترك الشغل لان في بعض الاوقات بيكون معانا اجانب في العمل وحكم الشغل انا تحت ايد غيري
4- قابل السيئه بالحسنه وارجع للكبير دايماً مهما كان
ياعم الحاج افرض الكبير ملهوش مبدء اضيع انا في وسطهم ؟ لا الكبير في اي مجال حتي لو كان سفيه اكيد ليه كلمه
مفاهيم صعب تطبق كلها وانا زي ماقلت لحضرتك بحاول
ان امرت ان تطاع فأمر بالمستطاع

الدنيا بالنسبه له ولاحاجه خالص هنا مربط الفرس ههههههه

أستاذ حمادة يعجبنى كثيرا حديثك بكل هذه الصراحة والتى أعترف أننى لا أستطيع أن أتحدث بهذه الكيفية لأننى أنطوائى بعض الشىء ويصعب على التعبير عن نفسى بهذه الطريقة الجميلة .فهى تحتاج الى اشخاص مميزين وصعب توافرها فى أنسان عادى مثلى .وفى الأخير فقد أرسلت اليك رسالة خاصة أرجو الرد عليه ولك منى كل الشكر

والله يا استاذ سعيد انا مبحبش اكون متكتف وانا بتكلم سيبك انت عيش وسيبها علي الله مطرح ماترسي دق ليها بالبلدي هههههه
الانسان ايه غير انه يصارح نفسه لو صارحت نفسك واتصالحت معاها هتكون اسعد خلق الله انا طبعاً بتكلم عن نفسي وعن شخصي والمبدء اللي عايش بيه
ربنا يبارك فيك ومايحرمنا منك يارشيق المنارة

كلامك صحيح ومنطقى وشكرا على هذا اللقب الذى أعتز به .كما أرجو أن ترد على رسالتى الثانية ولك منى جزيل الشكر

» حوار رمضانى شيق مع الاستاذ عبد الفتاح
» فضل المنارة
» معا من أجل المنارة
» المنارة سوق كبير
» عبر عن مواجيدك هنا فى المنارة