الثوره الفتيه ملحمه شعبيه

موضوع: الثوره الفتيه ملحمه شعبيه 5/3/2011, 1:01 am

حمدى حسين
الثوره الفتيه ملحمه شعبيه
إلى شهداء ثورة يناير شعر/ حمدي محمد حسين
مشهد معاد للى كان
والمكان مصر القديمه .. مش قوى
مش من زمان
فرعون .. هامان .. والذي حوله
ومجلس الأنس واللى بيداولو
حزب الليكود والركود واللى بيداهنو واللى بيحاولو
وضيف عليهم كمان اللى بيزاولو واللى بيناولو
كلهم حاولو.. يمنعوا الاحلام
ولما قلنا كفايا .. لما قلنا حرام
ضبابير نسور وسيوف ترزية الدساتير وقفولنا من قدام
لجموا الافواه وكتفوا الاقدام وزيفوا الإعلام
إغتالوا بكره وأمس وحجبوا عنا الشمس .. بنوا الجدار الكبير
عايزينا نصحى ننام .. على غنوة الايام .. فى عتمة المشاوير
وعشان نموت يا ولاد .. حكمونا باستبداد .. عاملونا باستعباد
30 سنة يا فساد واحنا نقول يا مجير
باللقمة زلونا .. بالكبت قهرونا وصادروا ع التعبير
يااحمد يابو سويلم .. ع الارض سحلونا ..
والادهى مشونا بعد اما مدونا حافيين على المسامير
وف سكة التعاتير .. على قافية التطوير
فتحولنا نايل سات وعرى ف القنوات
لهونا باتصالات وكوره وموبايلات
والشعب من غلبه يفتح البلوتوث ويحش فى الجرجير
لما بقينا كتييييييييييييييييير طوابير ورا طوابير ورا طوابير
مخنوقه فى مواصلات محروقه ف القطورات
مقتوله ف الطرقات فى حوادث البشاوات والبهوات والمشاهير
يا شعبنا الغلبان .. الغرقان .. العريان .. يا اكلنا الفسدان
يا ضيعة الاوطان .. ف حكومة التدمير
تشكر يا يوسف والى ع السرطان
شكرًا يا بطرس غالى .. على سرقة الجماهير
شكرًا يا ماما سوزان .. يا مخففه السكان
دى قزازه من دمى نازفها من همى
هديتى ليكى .. اعمليه مونيكير
لو تسمحيلى كمان .. أسأل سؤال بحنان
لما حفيدك مات .. حسيتى معنى القطع بالمناشير
لما الحفيد اتسرق .. ودم ابوه اتحرق
فكرتى فى التوبه .. فكرتى ف القبر ف الجبر
دوقتى طعم المر فى الصبر .. على فرقة الاحباب وقسوة التهجير
يا رب عفوك وحلمك .. ما اقصدشى ابداً شماته
واحلف طلاق بالتلاته .. انا قلبى زى الفطير
نضف قلوبنا بسماحتك
لكن اللى وسخ حياتنا وعاملى فيها نظيف
واللى جبر النقابه فادولوا كارنيه شريف
يارب وانت العظيم سلط عليهم عدالتك
شعب الكنانه الفقير
اللى الكنوز تحت ارضه .. لو وزعوها بضمير
لكن ولاد الحرام شدوا عليه الحزام .. ولبسوا هما الحرير
مش بس أكلوا الحرام .. دول شربوا عرق الأجير
ماسابوشى حتى العلم حتى الفتوى والتفسير
نهبوا اللى من تحت الرمال والرمال
سرقوا اللى فى جيوب العيال والعيال
دى تجارة الاعضاء ومافية الفرافير
حتى دهبات المره سرقوا الغطا م الزير
قلنا الدهب يتنهب مالهم ومال الجير
اهل الجهاله الرمم .. خايفين من الطباشير
عايزينها سوده وكحله سبورة التنوير
زاحوا الرموز والهمم
وطفشولنا القمم
وخطفوا اهل الذمم وملايكة التفكير
شباب يادوب عمرهم بالكاد يجيب 20
20 + 30 بقى عندهم 50 ولسه معتقلين
البرد كلَ جلدهم والعدلى ابن الكلب كل لحمهم
وقرقشت عضمهم رطوبة الزنازين
فضلك ايه منهم ؟؟؟ يا مصر غير عقلهم
شمعه وشعله وبشاره .. غنوه بلحن المراره
صرخه ف غياب الضمير
نزلت من الشبابيك على المواسير .. مش قادره حتى تطير
طب سيبنا نسمعها .. ونحس اوجاعها .. سكت بقى الدبابير
سيبوا العبير ينتشر يا نافخين الكير
امتى بقى تفهموا .. وامتى راح تؤمنوا .. بفكرة التغيير
يا دولة التطبيل والتسقيف والزمامير
زهقنا م الشوشره والفرقه والنتوره
يا دولة الرشوه والرش والتشفير
دفنتوا شعب الحضاره وهدمتوا أعظم مناره
على شعبها المستنير
وف ظل عزبة مبارك.. عشنا السنين العجاف
عشنا الزمان المرير
وف عهد حاكم عنيد
الظلم طابق وماسك .. فى العظم قبل الوريد
حزنت شعبك يا ريس حتى فى يوم العيد
ايه بعد جر السواقى .. طبعته اصبح بليد
ربيت عيالك فى لندن .. وطحنت شعب العبيد
عيل بيشخط وينتر .. م اهو ورث ابوه التليد
وقعدت تنفخ فى صورته
وقتلت " خالد سعيد " .. هذا الجميل الأمير
اللى الاله اصطفاه .. علشان يرد الحياه
ويقول بعلو الصوت لااااااااااااااااااااااااااااا لموتنا فوق السرير
هو صحيح قال ياريس قشايه تقسم بعير ؟؟؟!!!!!
ما فهمش .. أصلا غشييييييييييييييييييييييييييييم
قام هب " وائل غنيم " هذا البرئ الصغير
عبَر بصوت الشباب .. مزَع تشيرت العذاب
وكتبها أول سطوره .. فى صدر أشهر كتاب
فيس بوك جوجل توويتر
.. بدل ورقنا اللى داب
بدل العسس والغفير
مانديلا ينده جيفارا
وساره تنده سمير
بطرس يا مرقص يا مينا أحمد يا عبد البصير
شباب يصحصح شباب عامل وفنى وطالب
تقلت فاتورة الحساب كترت بنود المطالب
وشبابنا يعرف يغير
ولما كان القسم
فز العلم وابتسم
نفض تراب السنين
والحلم هبا اترسم
بالفل والياسمين
شباب وزى الورد
شوف الذوق
شالوا الورد .. سابوا الشوك
وطلعوا ع التحرير
يمام عصافير كناريا
بيغنوا للعدل للحريه للتغيييييييييير
طلعت خفافيش الظلام
منين ؟؟ ما تعرفش
وعملوا فيهم ايه ؟ مااقوللكشى
فى حد يطلق اسود على العصافير
ليله كانت بس هيه .. ليلة القدر البهيه
كلنا فى الليله ديه .. لما سال الدم ميه
كل واحد لاقى نفسه
والكلام .. زق الحناجر وانطلق فوق اللسان
باللى فى نفسه
واتجمعوا ملايين
خرجوا الشباب يعنى مش راجعين
فرشوا الميدان واتغطوا بالسموات
الشمس طلعت .. طهرت كل اللى فات
نزلت الرحمات
دم الشهيد انسكب فى كافة الميادين
شهداء يا منتصرين
على جنب نام الألم
بالدم فوق العلم
كتبوا الشعار الأخير
انت تمشى مش ح نمشى
فجأة فى لمح البصر
رأى الشباب انتصر
صبح الميدان لينا .. لوحدينا
نسهر .. نغنى .. نصلى .. ونقول أمانينا
وفجأة نط السؤال والحيره ف عنينا
الأمن راح ع فين ؟؟
الشرطه خفيت فين ؟؟
بنبص حوالينا
كيان كبير أشتعل
وكله كان مفتعل ولزقوه فينا
واشاعوا بين الناس
ان احنا مندسين وعملا حماس
كنتاكى ايه يا عم ؟؟
حط العنين فى الراس
ولا انت غربالك .. تبع أثار حواس
يا كدابين غوروا .. لا فرنك ولا يورو
احنا اللى ف التحرير وانتوا اللى ف التشخير
الجيش نزل ع الأرض يحمى الحمى والعرض
فجأه اللصوص زاموا .. كسروا السجون حاموا
حوالين شوارعنا..بقصد ترويعنا
.د سؤال كبير تانى مطروح لسجانى
احموا بقى بيوتكم ..حافظوا على حياتكم
ولا برضوا ح تناموا
لأ.. طلعوا رجاله..والهجمه صدوها بعزم وبساله
ما اروع المصرى ..لما يكون عصرى
مين داللى يمنعنا والا يرجعنا؟
وادى جيشنا حوالينا ..جناينى وجنينه..وطبيب لاوجاعنا
من تانى رجع الرئس ع الشاشه يخدعنا
ويزف ف القناوات انه بيسمعنا
خيرنا بين حاجتين .. يالفوضى يالتحرير
هتف الشباب ملايين
أنت تمشى وإحنا مش ماشيين
تعبنا م الإغتراب .. يا كوبانية عذاب
لسه بقية الكتاب
تطلق علينا اللصوص
تطلق علينا الكلاب
تطلق علينا البغال
تطلق علينا الجمال
تطلق علينا الحمير
أنت تمشى وإحنا مش ماشيين
افهم يا ريس خلاص .. هبت جنود الخلاص
صدقنى خلصت خلاص
لو مش مصدقنى .. اسأل جحافل بدر وابالسة التزوير
عز الحديد والصلب هذا القصير المكير
صدقنى ياريس .. ارواحنا عرفت تطيييييييييييييير
دم الشعوب إنسكب .. هبت رياح أمشير
كل أما تصعد روح تأخذ معاها وزير
كل أما تصعد روح تأخذ معاها وزير
كل أما تصعد روح تأخذ معاها وزير
كلاكيت زووووم ملحمى للحظة التنوير
سيدنا المسيح مصلوب على السارى
بينادى بالتطهير
والعدرا ف سمانا هايمه
بتنادى بالرحمه والعدل والتغييير
ومداحين النبى
بينادوا سيدنا النبى
يارب لجل النبى
عجل بهذا المصير
هبت رياح أمشير
خافوا اللى كانوا بيصدروا خوفنا
وسحائب البركات
سكنت جميع جوفنا
وصلت لشباك المشير
وف عز عز التمنى والترجى والصياح
من عز عز النواح طلع الصباح
من قلب قلب الليل
وفى ليلة الافراح
اتلمت الارواح
نفخوا النفير
سقط النظام من طوله فى التحرير
سقطت فلول الحزن والاشباح
سقط الكيان
فرعون
هامان .. والذى حوله
ومجلس الأنس واللى بيداولو
حزب الليكود والركود
واللى بيداهنو
واللى بيزاولو لعبة الدساتير
كفايــــــــــــــه
لحسن تعبت
من قبح منظرهم
اقفل معايا الصفحة
واطفى على صورهم
وادخل معاي ع النت
[ندعوك للتسجيل في المنتدى أو التعريف بنفسك لمعاينة هذا الرابط]- safhet eltameer
خش معاى ع النت على صفحة التعمير
شعر / حمدي محمد حسين

الاستاذ مصطفى عدلي
منقول رائع لشاعر اروع
تسلم ايادي الجميع ودام ابداعكم
تحياتي للأستاذ الشاعر الجامد
حمدي حسين

شكرا للمرور الطيب استاذ/يسرى حنفى

وبالانابه عن الصديق والشاعر الرائع/حمدى حسين

نتقبل كل الود والتحيه