ناس ....وناس

زائر

ناس ....... وناس
شفت كتير أشكال أجناس
شفت وشوش
شفت رتوش
شفت الناس من بين الناس

*******
ناس شقيانة
وناس تعبانة
وناس تتعب لو مضغوا لبانة
وناس ظهرها محني من الفاس

*******

ناس من كتر الغلا مكبوتة
مش قادرين يشترو كيلو قوطة
وناس مبسوطة
عايشه حياتها في شرب الكاس

*******

ناس فقرا ومش قادرة تعيش
أكتر كلمة تقولها مفيش
وفي ناس تاخد ما بتديش
وعشان تدي إيديها تتباس

*******

ناس كرامتها فوق الكل
رغم الفقر ما ترضاش ذل
وفي ناس واطية زي الفل
تِوْصَل لو حتى هتنداس

*******

ناس دايماً واقفين طوابير
لقمة عيشها ده هم كبير
وفي ناس رغم إنها طنابير
عمر ما تتعب ولا تحتاس

*******

ناس تديها ظهرك تإذيك
وناس تتمنى إنها ترضيك
عايشة حياتها كلها ليك
بتكمل معنى الإخلاص

*******

ناس عايشة في زحمة ودخان
شمس وحر وخنقة كمان
وفي ناس تانية قليل ما تبان
وبتتشال كده فوق الراس

*******

ناس تلاقيها ساعة الجد
عمر ما تتعب ولا تتهد
وفي ناس عمر ما ساعدت حد
نفسي وبس – أنا وخلاص

*******

ناس بالرغم إنها محتاسة
ما بتطلبش عشان حساسة
وناس تندب في عينها رصاصة
ناس منزوع منها الإحساس

*******

لكن بين الناس والناس
شفت وشوش
شفت رتوش
شفت الناس كده غير الناس

موضوع: رد: ناس ....وناس 12/9/2009, 7:46 am

والله اكثر من رائعه

الاستاذ/محمد السمان

وتحكى عن حالنا الذى لا يرضى عدو او حبيب

تسلم ايدك ويسلم قلمك

كل التقدير والاحترام

موضوع: رد: ناس ....وناس 12/9/2009, 10:04 pm

الأستاذ محمد السمان

قصيده عاميه أكثر من رائعه
قصيده معبره وترسم صوره واقعية لما نعيشه
تحياتى لك وفى إنتظـــــــار المزيـــــــــــد

موضوع: رد: ناس ....وناس 13/9/2009, 4:06 pm

ناس ظلمنتا وخربت بيتنا
وعند القاضي راحت سبقتنا
قبل الفاس ما تقع ف الراس

***

كانت فاكرة القاضي هينصف
طلع القاضي العدل ما يعرف
قلب الآية وضعنا خلاص

شكرا للسمان على القصيدة الرائعة
بس مين اللي كتبها

زائر

شكرا لمروركم الجميل اخى مصطفى واخى الجنتل واخى الاستاذ على
والى كتبها واحد مظلوم