بسم الله الرحمن الرحيم .... كل عا م وانتوا بالف خير وسعادة يا كل سكان دشنا .. وكمان المسئولين عن المنتدى .. ونخص أخوانا المسيحيين ... الحمد لله إننا غلابة ومالناش فى السهر .. حتى ولو كان لينا فى السهر . كنا يعنى هانجيب من فين فلوس السهرة دى الصباحى بتاعة الساعة 12 منتصف الليل .. فية ناس مرتبة السهرة من بدرى وحاجزة فى فنادق 5 نجوم قال اية و6 و7 و8 و9 و 10 نجوم و10 نجوم دى الفندق يسهر بدل عنك ولا ليك انت فى حاجة خليك كدة متسلطن وبلاش تفوق وارتاح وتلاقى الفندق عامل ليك كل حاجة بس يدوب بس انت تدفع الحساب وقت ماتصحى ولا فيه حد ها يصحيك يااسطى ياحلو انت ياسلطان .. ودة طبعا خلاف السهر فى النوادى والنايت كلب وكمان العوامات على النيل والمسارح والسيما .. عالم سهرانة لحد الصبح ياعم بفلوسها .. أكل اية وشرب أية ومية وصودا ( ياعم مين جاب سيرة الصودا والمية دى هو انت فاكر زى المية بتاعتنا دى اللى فيها بلهارسيا ورمل وطوب وزلط ) واحنا بنشرب ولا حد يهمنا كما ن اية يعنى يجيلنا الفشل الكلوى ولا الوباء الكبدى بعيد عن السامعين واللى بيقروا الكلام ده .. والله الحمد لله إننا غلابة وأغلب من الغلب كمان . تصدق دى نعمة من ربنا ( ماتقولشى دا قصر ديل ) الناس اللى مش غلابة زينا بيصرفوا فلوس جامدة قوى فى الليلة دى اللى تساوى مصاريف سنة كاملة فيه ناس بتصرف فى الليلة دى 5000 جنيه وكمان 10000 ويمكن اكتر ومين عارف يمكن اكتر ... الحمدلله على نعمة الرضا بالقليل والستر وربنا مع الغلابة اللى زينا . طيب ليه نغضب ربنا وننهى سنة كاملة بكل هذا البذخ الغير مبرر وكمان ذنوب وآثام .. ايه الفايدة من الوداع الغالى ماديا ده ويدوب الصبح تصحى من ليلة امبارح ( وتغنى وتقول ليلة إ مبارح ماجانيش نوم وإحنا لسة فى اول يوم) غريب امر الناس اللى مش زينا غلابة يعنى بعملوا كده هو يعنى مافيش أوجه للصرف والبذخ دة غير كدة . تعالوا ندلكم على مصارف ترضى ربنا والعبد احسن من كدة.. والفنادق تفرد مساحات كبيرة قوى من اجل زيادة الانفاق المدبر بعناية لكسب الزبون علشان يسهر صباحى يشرب ويتهوه فى دنيا ولا هو هنا ولا دارى ياعينى من السعادة الى هو واهم انه عايش فيها ..وداع مطين بالطين والصبح يستقبل 2010 وهو نايم من سهرة الطين دى .. والله الحمد ان احنا غلابة ومالناش فى الشو ده .. والله يرضى على الغلبان البسيط اللى يدوب مكفيها بالكاد والعافية عيش وفول وراضى بالقليل وبكفيه لقمة هنيه مع عيالة واهلة . ربا لك الحمد على هذه النعمة التى انعمت علينا والحمد على الصحة والعافية . ويارب سلم وبارك فى ديننا وفى اوطاننا وفى بلدنا دشنا وفى اهلنا وولدنا . واصرف عنا كل سوء ورضى وأرض عنا ياسميع ياعليم يامن بيدك كل الخير والعطاء يامعطى يامجيب . لك الحمد منا على كل النعم والفضل ياذا الفضل سبحانك ربنا . وأجعل الايام فينا خير الايام . واغفر لنا ما مضى . وحملنا يارب من عطائك كل الخير يامجيب الدعاء تقبل مننا .. لك الحمد ياربنا
موضوع: الحمد لله .... اننا غلابة 
31/12/2009, 11:50 pm
