ما تيجى نعيدها من تانى

موضوع: ما تيجى نعيدها من تانى 11/1/2010, 9:00 pm

ما تيجى نعيدها من تانى
وأنساها
وتنسانى
وبعد ما كُنّا بنعانى
هنصبح يوم
نلاقينا
برغم بعادنا والفُرقَه
يفتّش عنّا حُبّ جديد
يخلّينا
نعيش تانى
على ذكرى الخوالى من ليالينا
فى عِزّ الصّيف بنتمشّى
على جسور الدُّرَه فى الغيط
و(نَاف) السّاقيه و(الهوديا)
يدوروا ف ساقية احلامنا
وصوت الترس لوزيّق كإنّه سارينة الإسعاف
بيعلن عن حلول كارثة
وأهل العزبه يتلمّوا تجاه الصُّوت
فيهرب دمّنا فينا
ونتدّارَى
فى حُضن عيدان دُره غيطنا
تِحِنّ علينا وتخبّى
فى ضِحْكِة حلمنا النّابت
فى (شِنْهابِة) ملامحنا
وبعد ما تنتهى اللمّه
بنرمى بروحنا فى الحاره
نلاقى الشّلّه بتـ(صلّح)
ألاقيكى
بعزم الصوت
تقولى: (فيها لاخفيها)
أقوم شادّك
وآخدِك نلعب (الحجلة) و(نَطّ الحبل) و(الصّندوق)
وكُنتى بتخسرى دايماً
وبتقولى: ماتيجى نعيدها من تانى
أوآخدِك نلعب (اللّسْعه)
تُحطّى (العُقْله) ع الطّوبه
وبِتْزُقّيها بـ(المضرَب)
فأشقُطْها
تِقومى تصرُخى فيّا:
ما تيجى نعيدها من تانى
وآه لو تِرْجَع الأيّام
تِعيد بهجتنا مِن تانى
ونِرْجَع تانى وِسْط ولادنا فى الحاره
عياااااااااااااال تانى
أحــ زكى ــمد

موضوع: رد: ما تيجى نعيدها من تانى 11/1/2010, 9:44 pm

عزيزى: الجنتل
أشكر لك مرورك الطيّب الكريم...... وشكرا للثناء.. ويسعدنى أن اكون بينكم