نداء إلي السيد رئيس الوحدة المحلية لمركز ومدينة دشنا

أهالي مركز ومدينة دشنا يتقدمون بخالص السكر والتقدير إلى السيد الوزير محافظ قنا والسيد رئيس الوحدة المحلية لمركز ومدينة دشنا وإدارة مرور قنا وذلك بسبب الجهود التى قاموا بها من أجل استخراج رخصة للتكتك ويتمنى الجميع من أهالي دشنا أن يضع المسؤلون تعريفة محددة للتكتك داخل وخارج مدينة دشنا بمعنى أن تكون الأجرة داخل مدينة دشنا جنيها واحدا وتكون الأجرة خارج مدينة دشنا جنيهين (نجع قطيب _نجع قرين _نجع شحات _نجع طلحة _مصنع السكر )ونحيط سيادتكم بأن هناك مشاجرات عديدة حدثت بين الأهالى من المواطنين وأصحاب التكاتك بسبب الأجرة حيث أن السائق يصر على أن تكون الأجرة جنيهين على الأقل داخل المدينة ولو كانت المسافة بسيطة وقد اعتدى أحد السائقين على سيدة فضلى بالسب والشتم والإهانة وذلك بسبب إصراره على أن يأخذ منها ثلاثةجنيهات داخل المدينة ولولا وجود المارة فى الشارع لحدث أكثر من ذلك ونحيط علم سيادتكم بأن جميع مراكز محافظة سوهاج وضعوا تعريفة محددة للتكتك داخل المدينة وأصبح قانونا طبق على الجميع من السائقين والتزم الجميع به مع الإلتزام بالأخلاقيات العامة وحسن المعاملة من السائق للمواطنين

ولسيادتكم خالص الشكر والتقدير ومع لقاء آخر في النداء الثاني

اخى الكريم / شكرا على الموضوع القيم

وشكرا على المجهود المبذول نحو اخبار دشنا
ربنا يوفق
دمت لنا

شكرا ليك يا استاذ سيد ونتمني مزيد من الاخبار عن دشنا وللامام دائما

شكرآ أستاذ / سيد البسيوني

علي كتابه الموضوع وأن شاء الله ستحدد الأجره من واقع المسافه داخل وخارج المدينه

وتقبل تحياتي

أحمد سلامه محمد شحات

عضو المجالس الشعبيه المحليه لمركز ومدينه دشنا

رخصة للتكتك
والله الصعايدة هنفضل طول عمرنا غلابة

شكرا استاذ سيد على هذا المجهود الرائع الذى قام به المسئولون

اشكرك يا استاذ سيد على الموضوع الرائع
بس معقول الانجاز الرهيب ده للساده المسؤلين فى دشنا يعنى بعد انشاء مصنع السكر من اكتر من ثلاثين سنه معقول بقى فيه انجاز تانى طيب ده المفروض كده نعمل عيد لدخول التوكتك لدشنا ونرمى توكتك فى النيل كل سنه زى عروس النيل وعلى فكره هو صحيح حيكون الشهر الجارى فيه عيد دشنا القومى على غرار المدن اللى قاومت الاحتلال والانتفاضات اللى بتحصل وثورة 1919 بتعات سعد زغلول وثورة الضباط الاحرار لما دخلوا بالدبابات على قصر عابدين؟

سيادة المستشار حضرتك بتتكلم بجد

عيد قومى؟!!! ايه المناسبة
علشان سمعنا اسمنا منور فى التليفزيونات ممكن

هو باقى غير الضحك تانى يا استاذه منحه وعلى العموم شر البلية ما يضحك بس ايه رايك مش تبقى حاجه فانتاستك خالص لو عملنا عيد دشنا القومى اصل زمان الفلاحين فى الوجه البحرى كانوا البشاوات والامراء من اسرة محمد على يجلدوهم بالكرباج حضرتك مش كنتى دايما تسمعى فى الافلام القديمة الباشا وهو بيقول اخرج بره يا فلاح هات الكرباج عبد الصمد فطبعا مين ادى الفرصه للبشوات يعملوا كده فى الفلاحين غير الفلاحين نفسهم هم اللى عملوا فى نفسهم كده جعلوا خدهم مداس للشرطه قصدى للبشوات وبعد كده منتظره ايه يحصل الا انه الباشا يجلد ابن اخت الفلاح من غير ذنب مع انه الفلاح ده هو المصرى الاصيل صاحب البلد فلما يحاول الفلاح يعمل اى رد فعل تبقى الكارثه حصلت لانه مش معود البشاوات على كده معودهم هو وابائه واجداده وكل الجناينيه اللى كانوا قبله فى السرايا السمع والطاعه ويعنى اللى قبل الفلاح ده عملوا ايه كان برضه معود الباشا السمع والطاعه حتى لما وصل نقيب الفلاحين وممثلهم وكبيرهم كانوا عايزين يعاملوه نفس معاملة الفلاحين امثاله مش هو واحد منهم ورضى انه قريبه يتهان يبقى اكيد هو راضى انه الكل يتهان وهو اولهم بس يبدوا انه المره دى واحد ابن حلال ادالوا برشامة صراصير ونسى نفسه انه هو اللى خللالهم خده مداس ولا الله اعلم اذا كان عمل زى فيلم الارهاب والكباب لما عمله الراجل ارهابى وهو من غير قصد فى مجمع التحرير راح يخلص مصلحه من مديرية التعليم فى الدور الخامس وبيتكلم هو العسكرى العسكرى وقع ووقعت منه البندقيه وطلعت رصاصه وباقى العساكر والناس هربوا وسابوا سلاحهم وقالوا ارهابى وبقى بطل بالصدفه وهو اغلب من الغلب الله اعلم ايه اللى حصل بالظبط بس يمكن يكون الكبت او الظروف الخارجيه او هو اتورط او عملوها فيه الولاد من غير قصد المهم حصل اللى حصل والموضوع كبر وكمان فيه اسرائليات كتير وفيه شيعه وخوارج وكل واحد ليه رايه طبعا الشيعه قالوا بطل والخوارج قالوا ازاى يحصل كده المفروض الواحد يبقى محترم والاسرائليات زادت على الموضوع وحطتله بهاريز والله اعلم المهم فى الاخر قامت الثوره بس فشلت مش زى ثورة الفلاحين على البشاوات لما اخرجوا اسرة محمد على والملك من مصر ده المره دى يمكن البشاوات همه اللى حيخرجوا الفلاحين من تحت القبه لان الفلاحين زمان كانوا يد واحده لكن الان زى ما ذكرت شيعه وخوارج ومرجئه وغيره وعلى فكره فيه ناس كتير راحت للبشوات وفهمتهم انه الفلاح ده ملهوش ضهر ولا حد حيوقف معاه وياريت النقابه تطلعه منها خالص ولا الحزب حتى يجيبه تانى عشان نرتاح منه يا مسكين حتعمل ايه لوحدك وانت لاخلتلك لاحبيب ولا قريب حتى اللى كنت تحسبهم حيكون معاك وكنت تفتخر بيهم وتقول صحابى بتوع الحديد والسيرميك كله ضدك لانه مصلحة البشاوات اولى مين يقدر يخليك تستمر غير الناس الغلابه اللى وقفت معاك وانت سيبتهم وروحت لتجار الحديد ونسيت الغلابه والارامل اللى كانوا يجوالك من القرى عشان يصوتولك فى دشنا عشان صوتهم يوصلك على حد عقولهم؟؟

سيادة المستشار اللى يبص لفوق يتعب
احنا كفايانا التكتك على مقاسنا بالضبط والملى
صاحبك عامل زى واحد عايز يسيب فاو ويعيش فى مارينا
اقول لحضرتك ايه بلاش تغيب عن المنارة كتير

شكرا يا استاذ /سيد بسيوني على مجهودتك

بجد انا بحس انك عوذ تعمل حاجة فى البلد مهما كانت الحاجة دى صغيرة بنسبة للغير موجودين

فى البلد بس فى نظرونا نحن حاجة كبيرة فعلا مشكلة التكاتك دى مشكلة كبيرة وعيزة اهتمام ربنا يوفقك

بشكر بشدة سيادة المستشار/صلاح بيك رسلان

على تعليقة السياسى وعلى تلخيصة للحدث بطريقة ممتاذة

بس اول مرة ارك تمسك العصا من النصف لا تبع الشيعة ولا تبع الخوارج

ومرة مع سعد ذغلول ومرة تبع البشاوات

ومتزعلش من الغلابة والارامل علشان بردة هيصوتو الدورة الجاية لسعد ذغلول جديد عارف لية يابشا علشان غلابة قوى يابية وقلبهم طيب وبيصدقو اى حد

استاذه منحه احنا عايزين يبقى طموحنا عالى وعايزين نصوب للشمس حتى اذا لم ندركه ربما ادركنا القمر وامثال الاستاذ سيد بسيونى والاستاذ احمد سلامه اعضاء الحزب والوحدات المحليه شافوا مشاكلنا وعاشوا معانا ممكن الواحد فيهم لو اصبح نائبا فى المجلس التشريعى يقدر يعمل حاجه وبيحاولوا يعملوا اللى يقدروا عليه لكن المصيبه فى اللى عايزينها وجاهه بس وميعرفوش حاجه فى السياسه وربنا يولى من يصلح
الاستاذ تايه انا لم امسك العصا من نصفها عمدا بل انى اقول الحق ولا اخشى فيه لومة لائم وانا لم اتبع الشيعه ولا الخوارج لان شيعة على هم خوارج معاويه وشيعة معاويه هم خوارج على وطبعا على ومعاويه صحابه يعنى زى حواريين المسيح عليه السلام منقدرش نمثل حد بيهم فانا لو اتبعت شيعه فلان ابقى من خوارج فلان ولو خرجت عن فلان ابقى من شيعة الاخر ولا انا مقتنع بفلان ولا بفلان لانهم كلهم صنف واحد وفكر واحد ومجتمع واحد ولم يغير الزمان في اى منهم شيئا الا اذا من الله علينا برجل يغير ويقوم المعوج فى تلك البلده التى يجمعها مزمار وتفرقها عصا وايدى اصحابها كلت من التصفيق والسنتهم يبست من النفاق لنوابهم واتبعوا اهوائهم فضلوا واضلوا واتبعوا من لم يزده ماله وولده الا خسارا واتبعوا سادتهم وكبرائهم فاضلوهم السبيل ولكن نسال الله العلى القدير ان يختر لنا ما فيه كل خير ويصرف بعفو منه كل ضير وان يرزقنا حسن التوكل عليه فنحن لانعرف الاختيار فنستخير الله بقدرته وبعلمه فانه يعلم ولا نعلم ويقدر ولانقدر وحسبنا من قوله وعسى ان تحبوا وعسى ان تكرهوا ما اثبته الواقع من خير فيما نكره ومن شر فيما نحب

سيادة المستشار

المشكلة مش فى الاستاذ سيد او الاستاذ احمد
من معرفتنا لهم فى المنارة نحسبهم على خير
المشكلة ان الحزب خلانا لانفرق بين الكويس واللى عايزها وجاهه ومكاسب
ومين بينتخب حد اصلا
هما عارفين ان الصعيد لايعرفوا اى من الاحزاب ولكن الانتخاب عندنا قبلى وعائلى
وكل كبير عيلة نائب فى اعطاء اصوات العيلة فى من يتفق عليه بينهم
يعنى مش علشان سواد عيون الحزب
علشان كدة الصعيد هو اللى بينجحهم بدون قصد
احب اقول للاخ تايه اللى مش عايز يقوله لى
المشكلة مش انى بستقل من حاجة الناس البسيطة للتكتك او انى متكبرةعلى كدة

بس ذى ما قال سيادة المستشار احنا عايزين طموحنا يبقى عالى ونعمل فعلا شىء مفيد للبلد مش كلام وبس ونائب الشعب اللى يعرف فعلا يدافع عنا مش عن مصالحه وبس

شوف كل اهل قنا لاينسوا اللواء عادل لبيب ولن ينسوه
اذا غامرت فى شرف مروم**** فلاتقنع بما دون النجوم
ومبروك علينا التكتك وعقبال الجامبو

طبعا اكيد محدش يقدار ينسا مجهودات اللواء عادل لبيب

لاانا الله لايضيع اجر من احسن عمللآ

وانا كنت اقصد كل واحد مسئول او فى مركز مرموق

ممكن يقدر يعمل حاجة يعمل ولاناخذ دور المتفرج

يعنى انا نفسى فى واحد فى علم سيادة المستشار صلاح يدخل الانتخابات او اى حد يقدار يعمل حاجة فى البلد يعمل

عوذين ننهض بلبلد عوذين نعمل حركة ونسميها كفاية حال البلد بقا وحش قوى ونسبه الفقر ذادات قوى وكل وحد بيقول ياله نفس
تعالة شوف القهوى بعد ما كانت تقتصر على كيبار السن بق معظم الشباب موجود فيها مفيش حد بيساعد حد

مفيش مشروعات جديدة فى يأس كفاية حرام والله العظيم انا اكتر واحد فى البلد بيتعمل مع الشباب بحكم شغلى لدرجة انا بشوف شباب فقد الامل مش فى بكرة لا فى اليوم

ولا املك الا انا اقول ربنا موجود ومطلع على كل موقصر فى حق بلدة

» شكر وتقدير للسيد اللواء محافظ قنا والسيد المهندس / رئيس الوحدة المحليه لمركز ومدينه دشنا
» قاعدة معلومات عن مركز ومدينة دشنا
» انشاء الوحدة المحلية لقرية ابومناع غرب
» السيد الوزير محافظ قنا في دشنا
» منتدى جديد عن مركز ومدينة دشنا بيتكلم بكل صراحة وهو دشنا اليوم