المستشارصلاح رسلان
مشرف سابق
العمر : 49
عدد الرسائل : 864
تاريخ التسجيل : 05/12/2008
 |  موضوع: الجاموسه كشفت المستور  4/11/2009, 2:21 pm | |
|
في زيارته الأسبوعية للملك رمسيس الثاني بصحبة الشيخ غريب، وضع روكا الحرامي تحت قدمي جلالته قفة عيش شمسي وقال له: هدية بسيطة من الصعيد سيادتك. أصل انا امبارح كنت في جرزا. البلد اللي حصلت فيها حادثة قطر الصعيد. رحت آخد بخاطر ابو عصيدة صاحب الجاموسة اللي فرمها القطر. هو الوحيد اللي طلع من المولد بلا حمص. كل اللي راحوا في الحادثة أهاليهم قبضوا من الحكومة إلا هو سيادتك.. ولولا الجاموسة بتاعته ما كان حد منهم طال مليم.
قال الشيخ: مصائب قوم عند قوم فوائد !
قال روكا: ابو عصيدة كان قاعد يندب في العزا بتاع الجاموسة ويقول يا خراب بيتي من بعدك يا حلاّبة يا ولاّده يا جلاّبة القشطة. وراسه وألف سيف يروح للمحافظ ويقول له أبجني شوية بواكي زي باقي الخلق اللي فرمهم القطر وأهاليهم قبضوا بواكي متأستكة. العمدة قال له إسكت يا أهطل وحط في حنكك برطوشة قديمة. بواكي إيه اللي عاوز تسلتها بالغصب من جيب الحكومة. إحمد ربنا انها سايباك تبرطع في البلد براحتك. لولا الحكومة قلبها أبيض ومليان حنية كان زمانك في التخشيبة مع بهوات السكة الحديد. لو كنت عرفت تربي الجاموسة وتشكمها كانت عرفت الصح من الغلط. ما كانتش اتفرعنت وعملت راسها براس القطر واتصدرت قدامه لحد ما فرمها.. وفرم معاها الوزير ورئيس الهيئة وبهوات كانت كلمة واحدة منهم تخللي أجدع موظف في الهيئة يهُر.. كلهم فرمهم القطر ياولداه .
قال الشيخ: وفرم الحكومة يا معلم !
قال روكا: أبو عصيدة حط راسه بين إيديه وقعد يصرخ بعلو صوته ويقول يا ناس حرام عليكم. الجاموسة ما تدركش. دي طير أخرس فِهمه علي أده . شيخ الغفر سمع كلامه اتحمق ووشه زنهر وقال له خرس حِسك واسْوَد وشك يا أهطل يا وش النحس، ورفع البندقية وقال له عليَّا الطلاق من نسواني التلاتة لو بينضرب بيها نار كنت فرغت الخزنة في نن عينك وريحت الحكومة من بلاويك يا طماع ياجلاب المصايب . لولا عضو المجلس المحلي طبطب علي كتفه وباس راسه وقال له قلبك أبيض يا شيخ الغفر. اخزي الشيطان وسيبه يندب ويزن وياكل في نفسه. يمكن الحزن علي الجاموسة يجيب أجله ويحصّلها بذنب الحكومة.
قال الشيخ: اللي بييجي عليها ما يكسبش !
قال روكا: النايب بتاع الدايرة رفع البلغة في وش أبو عصيدة وقال له: اخرس يابجم ولف لسانك بفوطة صفرا واوعاك تجيب تاني سيرة الجاموسة يا ابو جاموسة. عملتك السودة كشفت المستخبي وخلت رقبة الحكومة أد السمسمة.. السكة الحديد كان فاضل عليها تَكة وتقطع النفس وتفرفر قبل جاموستك السايبة العايبة ما تقعد علي القضيب وتحط رجل علي رجل وتطلَّع لسانها للقطر. كانت ماشية بدعا الوالدين . خربانة ومفستكة وريحتها فايحة وحالتها عدم . بس ربك كان ساترها مع البهوات بتوعها. كانوا كافيين علي الخبر ماجور. لحد جاموستك ما كسرت الماجور وكشفت المستور.. إلهي تنكسر رقبتك.
سأله الشيخ: لِوحده يا معلم ؟
| |
|
المهندس ايمن حسين مرعى
عضو فعال
العمر : 56
عدد الرسائل : 1969
تاريخ التسجيل : 22/11/2008
| | موضوع: رد: الجاموسه كشفت المستور 4/11/2009, 3:06 pm | |
| جاموسة قصمت ظهر الوزير وفعلا المثل القائل وضع سره فى اضعف خلقه وخلى الوزير يتفرغ لتوكيل المارلبورو بتاعه ولطائرته الخاصة والى 258 شركة له فيها انصبة واسهم | |
|
