استدعاء عاجل..للاستاذ عبد الباسط عبد الستار

بسم الله الحمن الرحيم

اختى الفاضلة : زهرة

اخوتى الزملاء: وهم كثير

ذكرت الزهرة لانها صاحبة الدعوة

وبعدين

كرسى اعدام كهربائى

انت ايه دموية ...اوعى تكونى كدة

من اولها...ترهيب .... فية حاجة برضة اسمها الترغيب

باين عليكى نيتك


سودة... من معى فى البيت

خايفين


قلت معلهشى ... زهرة ...دى زهرة

اقنعتهم ان الكرسى على الهيئة .معد للاعدام..لكن مافيش كهرباء موصلة بية

قالوا يمكن ..يكون معاها ريموت كنترول ......

من بعد الجلوس عليه والاعتراف ...بالخيانة والجاسوسية

تنفذ حكم الاعدام ....

قلت اعوذ بالله ...خيانه ايه وجاسوسيه ايه دى


عموما .... عندما شرعت فى التجاوب ...قالت لى زوجى المصون

السيد : حسن نصرالله يلقى كلمه مباشرة على الهواء

عنوانها ...يوم المحارب العملاء والاعدام

قلت خير اللهم اجعله خير

...على فكرة مافيش وسيلة اعدام غير الكرسى ده

علشان انا با أكره امريكا وايه صناعة او دعاية امريكى

لكن هااقعد والامر لله

تحت امرك وتحت امر جميع من فى المنتدى الزاخر حبا وعطاء ووصال واتصال

ربنا على المفترى ياشيخة

اسمى : عبد الباسط عبد الستار هاشم

العمر : 48 عام

الوظيفة: محاسب ببنك التنمية والائتمان الزاعى بدشنا

الناحية: صعايدة دشنا ...اسكن فى شارعى عمر بن الخطاب وشارع السنجق

متزوج واعول اسرة

لى : ابنتين الاولى : ندا محمد طالبة بكلية الحقوق

وهى ابنه اخى اتشرف بها وانعم ..جل جهدى العناية بها تلبية لواجب الاخوة تجاه اخى المتوفى الى رحمه الله المرحوم محمد

نسدد له بعضا من جميل كبير طوق به عنقى وارضانى..

والثانية: ابنتى وتدعى ( رؤ ى )....KG.2

اأأمل فيها كل الخير والرضا

احب رد الجميل ...

وكلى انصات للحوار واعد بصدقى مع الجميع ممن يتواصل معى فى الحوار

بسم الله الرحمن الرحيم

الاخت زهرة


معلهش ..من بعد الدخول والموافقة . ذهبت الى قنا لامر هام والحمد تم توفيقى

ورجعت .. واتعشيت والان اشرب الشاى امام الكمبيوتر والنت

انا مش نازل سخن ولا حاجة بس خايف شوية وكمان الكرسى ياستى يرعب

يعنى ولا حركة منى على الكرسى دة......عموما سمع وطاعة وحاضر

ايه رأيكم نغير الكرسي
علشان نثبت حسن النية
ونبعث روح الاطمئنان
ونساعد استاذنا على الاسترخاء والاجابة بصراحة مطلقة
انا جبت كرسي من عندي
[ندعوك للتسجيل في المنتدى أو التعريف بنفسك لمعاينة هذه الصورة]

إيه رأيك يا باشا

جبت له كرسى هزاز يا استاذ محمد
الله يسامحك
كده حايقعد يتمرجح مننا يمين وشمال
الكرسى الاولانى كا خانقه تمام

وطبعا يا استاذ محمد جلال
اطرح اسئلتك علشان يبقى محمد جلال عن يمينه
وزهره على شماله حايروح فين مسكين

ياللا يا استاذ عبد الباسط قولنا سيادتك حاتشرب ايه
ولا طمعان فى غدا ولا ايه الحكايه
علشان نبتدى شغل

بسم الله الرحمن الرحيم

الآن انا فى المنزل وفى شوق لاسئلة اخوتى وزملائى


اتفضلى يااخت زهرة





اشرب شا ى خفيف بلاش ليمون التوتر احسن

اتفضل حضرتك
آدى الشاى

[ندعوك للتسجيل في المنتدى أو التعريف بنفسك لمعاينة هذه الصورة]

وادى الكيك

[ندعوك للتسجيل في المنتدى أو التعريف بنفسك لمعاينة هذه الصورة]

نبدأ الاسئله ان شاء الله

ليه الكرم الحاتمى دة ....عموما احمدك يارب..شاى وايس كريم يهفف النفس

عموما انتى مش حرمانا من حاجة ... بدية مبشرة بالخير

[ندعوك للتسجيل في المنتدى أو التعريف بنفسك لمعاينة هذه الصورة]

لو قلت لك تقدر تفتكر لنا حاجه من وانت فى المرحله دى مش حايحصل
بلاش

طيب تقدر تقول لنا الطفل ده بيفكرك بحاجه

[ندعوك للتسجيل في المنتدى أو التعريف بنفسك لمعاينة هذه الصورة]

كلمنا عن طفولتك
وذكريات زماااان

الصورة الاولى ..للوهلة الاولى ....تذكرت بطن امى التى حملت ثم وضعت وعانت كثيرا ... ومن بطنها الاخوة معى فى الدنيا وكذلك اخوتى البنات ونحن 11 فرد


اواه ياامى....... لكى الرحمة ومعك كل الامهات التى رحلت وعمر مديد لامهاتكم الفضليات الغاليات

فى جنه الخلد ياامى

الصورة الثانية : القهر الذى يمارس على الاطفال .. والعصا لمن عصا

وليست من اصول التربية فى النشئ... تولد فية الخوف .. وتقتل فية الروح

وتحرمه حياة الطفوله ... يبدو انه يخاف ويحاول ان يهرب من واقع

وانا ضد العنف مع الطفل بكل صورة واشكاله ... وللعقاب اساليب اخرى

طفولتى عادية جدا ... استمتع بكل مافيها.. لم اولد وفى فمى معلقة من الذهب ولكن كلن الحال جيد وفضل الله كان يسير

ككل اقرانىفى هذة المرحلة ... لم ننام على الوثير ولا ننعم بالغنا .. ولكن كان فضل الله وفير

كان عندنا الجاموسة والبقرة والاغنام والماعز والحمار والحصان وكل انواع الطيور

مش قلت ليكى كان الخير تمام ..... بس دلوقتى مافيش غير فضل الكريم ... احسن تيجى وتقولى عاوزة وعاوزة

بجد كانت الطفولة ... غير التى تشاهدى حتى فى اللعب وفى الملبس وفى كل شيئ

كنا بسطاء ونحن البساطة .... الحلو كان رز ولبن وزلابية وجلاب

والمشروبات كان اسمها كازوزة ( لما يكون الواحد ياعينى كدة راقد وعيان)

بس مش زى بتوع الصومال بؤس وفقر وقفر وعطش

[ندعوك للتسجيل في المنتدى أو التعريف بنفسك لمعاينة هذه الصورة]



تركنا مرحلة الطفولة بما فيها ونذهب الآن الى مرحلة الشباب


واختيار الأصدقاء ...والنظرة للمعلمين


ومن من معلمينك له بصمة حتى الآن فى حياتك وتذكره بالخير



وكيف اخترت اصدقائك

كان ترتيبى السادس بين اخوتى

كان ابى متعه الله بالصحة والعافية يحب الاولاد والعزوة ويكرة للوهلة الاولى البنات ولكن بعد كدة تلاقبة يعشق البنات وبيحبهم اكتر من الاولاد

كنا نلعب اللعب العادى وقتها ..زى الاستغمايه وكان الواحد يقعد يدور على صاحبة طول الليل ممكن يكون راح استخبى فى بلد تانى ولا راح روح ونام وطول الليل ندور على بعض

وكمان كان فية الحامية والفويدة ... اهى العاب بئة ..

اسالى الاستاذ عبد الفتاح يمكن فاكر وعارف اللعب دة

فكرتينى بايام زمان كانت بجد حلوة


كان الحب هو عنوان كل شيئ


كانت اماهاتنا تتعامل مع اولاد الحته والشارع والصحاب زى اولادها بالضبط

والله العظيم تلاقى ام فلان سايبه نايب اللحم او البطيخ لصحاب ابنها بالضبط

وتقول عندنا مثلا عدس يافلان اجيبلك تاكل ياابنى

الكلام دة خلاص مش موجود

كنا طبعا بننضرب بس مش على الفاضى والمليان...لما نزعل ابن الجيران والصحاب

ولما نقصر فى الخدمة واكل المواشى .. انت سايب البهايم عطشانة .تقدر انت تقعد عطشان ياواد

ونروح نحش الحشيش من الحرجة والغيط ونرجع عصارى بالحشيش للبهايم

ونتغدى ونرجع تانى على الخلا والغيطان لحد غيلب الشمس قرب المغارب

والله كانت الحياه حلوة وبسيطة

واللى بقولك علية دة بيعملة الفقير والغلبان والغنى ....متعة مابعدها متعة حياة زمان


ياريتها دامت واستمرت.. كان ايامنا جمال عبد الناصر

وام كلثوم والتجمع عاى الراديو والاستماع الى حفلها وغانيها باستمتاع

وكان هناك ... اذاعة القرآن الكريم وصوت الشيخ عبد الباسط عبد الصمد

وكان لى شرف المصافحة معة يدا مع يد عاشان اسمى زى اسمه كمان

وكان صوت ومفجر الثورة فينا عبد الحليم حافظ

حتى الاغانى والله كانت احلى من دلوقتى ولها قيمة ومعنى

حتى الاغاانى الشعبية احلى من الان

الله انا مشتاق لايام زمان

كان فيه برغوت وبق بس مش عندنا

كنت فين كنا عند فلان .. طيب روح على المحل ( يعنى الحمام ) واقلع هدومك قوام... كانت والدتى تخاف من البق والبرغوت..... يكفيكى الشر ..ولا تعرفى تنامى

ولا حتى تفكرى

وعلى الرغم من كدة كانت الحياة حلوة قوى

اضمنى لى عبد الناصر وام كلثوم وعبد الحليم والشيخ عبد الباسط والناس بالفطرة بتاعة زمان ارجع تانى تانى للحياة دى .. مااحلاها ما اجملها

ياسلام لما يرجع الواحد من الخلا راكب فوق ضهر الجاموسة قرب الغياب

حتى لبس البنات كان احلى واستر ( جلابيه كستور ومن تحتها لاوم البنطلون الطويل .. والبيجامه البطلون واسع والجاكت لحد الركبة والشعر علية طرحة او قمطة... تفدر اختى تظهر بلبس مش مستور تتعجن عجن والام تقول احسن فيكى

يامضروبة يامقطوعة الرقبة...وكمان لما يسمع الوالد يزيدها كمان


والصبح ولا كأن حاجة حصلت ... تعمل كل حاجة وهى راضية مش تتذمر وتقول مش هاعمل ... كانت تعرف ان الضرب لمصلحتها واخواتها خايفين عليها .

فكرتينى بزمان بس لية

والله الحديث معاك ممتع للغايه يا استاذ عبد الباسط
بس انت فضحت الدنيا بحكاية
كان فيه برغوت وبق بس مش عندنا

كنت فين كنا عند فلان .. طيب روح على المحل ( يعنى الحمام ) واقلع هدومك قوام... كانت والدتى تخاف من البق والبرغوت..... يكفيكى الشر ..ولا تعرفى تنامى

ولا حتى تفكرى

وصدقت فى قولك حكاية البوت مفتوحه على بعض واللى عندى عندك
الآن اصبحت الحياه تخنق
بعدين احكى معاك فيها
المهم الآن تكلمنا عن الصداقات والمدرسين زى ما قلتلك فى السؤال

انا من جيل الستينات ..... كان للمعلم فينا تقدير واحترام عظيم

كنا نحتر م المعلم لدرجة اننا كنا نخافة ونهابة حتى وهو مار بالشارع نستخبى حتى لا يلمحنا ..


وقوام نجرى على البيت .. ويقولوا لينا هوفية اية نقول الاستاذ والناظر بتاعنا معدى فى الشارع.... الاستاذ زمان كان اسمة الناظر.....

عارفة دلوقتى الطالب والتلميذ بيشرب وا السجاير مع بعض

علشلن المدرس تخلى عن قدسيته بمزاجة وجرى وراء الهوى والمادة

الاصدقاء كنا من ايام الابتدائى والاعدادى والثانوى

كنا من كل البلاد من دشنا والسمطا وابومناع وفاو قبلى وبحرى وابودياب والعطيات والحراجية وعزب المصرى والميلت والفاوية والجحاريد

كان ايامنا مدرسه اعدادية واحدة وثانوية واحدة فى دشنا

والمدرسين كانوا مغتربين من بلاد اخرى بعيدة وكانوا يقيمون فى دشنا

دلوقتى الحال اتغير كتير ومدارس لبتدائى واعدادى وثانوى كتير ...

كان ايامنا كل صف فصلين يعنا مثلا 3\1 و3\2 .... دلوقتى فية 3\1 لغاية 3\17

الناس زادت والدنيا زادت

كنا نحب ونحترم النظار بتوعنا ونجلهم حتى الان من منهم على قيد الحياة

ومنهم على سبيل المثال وليس الحصر

الاساتذة الكرام( احمد الوجيه. جابر يوسف. حسن عبد الوهاب .محمود نصير . محمد عبدالقادر. عبد الرحيم السمان. محمد فارس. ممتاز. حمادة الزحلوقى.خيامى.

مهران . محمد عبدالعزيز. عبد المنعم السيد. جابر رزق . عبد مناف. السعدنى. صلاح. كمال سليمان . سراج. وكثير فى الذاكرة..
كل من درسنى له بصمه فى حياتى وكل التقدير

ليس اقول ذلك الا حبا لهم واحتراما


هم من شكلوا فينا هذا العطاء وذاك الموجود فينا حلوة كلة

اخترت اصدقائى وصحبى بعناية


كنا مع بعض دائما


لم نبتعد ن بعض سوى بعد الثانوية العامة

ولم اكن شاطر جدا ولكن كنت معقول

وانا اقل واحد فى اصحابى وهم تاج رأسى ورصيدى

منهم الضابط والمهندس والمحاسب والاستاذ والاخصائى الاجتماعى والقاضى ونائب للشعب وكذلك للشورى.. واستاذ جامعى ومدرس جامعى وكذلك معى اصدقاء امييين ( للقراءة والكتابة) اعتز بهم وبصحبتهم ومنهم المزارع ومنهم الطبيب والعامل

الله يلعن الدروس الخصوصية ...ضيعت هيبة ووقار المدرس المحترم

كل شيئ دلوقتى مباح بين الطالب والمدرس

زمان كنا نحن الولاد نخاف من المدرس وكمان البنات تترعب وكانت البنت خجوله ... وخجلها دة كان مخليها احلى

كنا نخاف على البنات ونجيب لها كل حاجة وماتروحشى فى زحمة الشندوتشات

يقدر حد عاكس بنت الحتة ولا الجيران

شوفتى دلوقتى زواج عرفى وهباب فى هباب

طبعا مش كل البنات ... والتربية هى اساس كل شيئ

اختلفت المقاييس الآن وانقلبت راسا على عقب
دا انا لما كانت ماما تبعتنى فى طلب
واشوف واحد من المدرسين فى الابتدائى
ارجع فرحانه واقولها يا ماما انا شوفت الاستاذ فلان
كانى شوفت الزعيم

على فكره انا اعرف واحد من مدرسينك دول
بس حاخليهالك مفجاة لانى سأطرح له ملفا خاصا لانه يستحق كل خير
حاديلك قطعة شيكولاته لو عرفت مين هو
........
المهم
السؤال اللى بعده

موقف مر بك فى حياتك ترك معك بصمة حتى الآن تذكره بالخير او ب....؟

فعلا موقف جميل ومشرف
ولا ينسى
سؤال

موقف اتخذته وندمت عليه أشد الندم ؟