مسابقة شعرية في الرباعيات لأعضاء المنارة

المسابقة لشعراء العامية

الشروط

أن تكون المساهمة من أربعة أبيات

أن يكون الشعر من إنتاج العضو وليس منقولا

يبدأ المتسابق رباعيته بنفس الحرف الذي انتهت به الرباعية السابقة له

وهكذا إلى نهاية المسابقة

********

على بركة الله

نبدأ المسابقة برباعية لصلاح جاهين

مع إن كل الخلق من أصل طين
وكلهم بينزلوا مغمضين
بعد الدقايق والشهور والسنين
تلاقى ناس أشرار وناس طيبين

****

المسابقة مقتبسة من ملتقى الأدباء والمبدعين العرب

فكرة جميلة ياأستاذ على وأنا أول المساهمين:
نحبك ونودك وانت اللى بايعنا
بعلو الصوت بنادى وأنت ماتسمعنا
كلامنا عند الناس موزون وعندك مالوش معنا
ياريت قبل ماتفارق ياحبيبى تبقى تودعنا

المسابقة قمة فى الجمال

وساكتفى هذه المرة بالمتابعة والتشجيع

لنستمتع بما يقدمه لنا السادة الاعضاء

وكلى يقين انهم سوف يبهروننا

يعني لو زهرة مش ف المسابقة يبقى ليها طعم ؟!!

شاركي معانا مش هاتندمي

ـــــــــــــــــــــــــــ

نكمل

أنا من زمان مرتحل والآهة زوادي

صورتك يا حزن وأمل مرسومة بفؤادي

لو كان منايا اكتمل ما كنت يوم سبتك

ومشيت طريق اتعمل علشاني جلادي

ماشى يا استاذ على
أشارك

يا طالع النخلة شمر جلاليبك

تشبك فى فرعة شوك على الارض وتجيبك

والتمر بيك من بلاك طارح على عروقه

واللى بيجمع خير شوكها ما بيهمه

مثبت الأقدام وبايده بيلمه

لست مشارك فى المسابقة ولكن اتذوق الشعر ولا اقرضه
ولكن مع الاحداث ارتجل كلمات تقبلوها منى
هيه ياامة على فين رايحه
هو يقول شيعي
وانا اقول سني
والعدو متربص
لايهمه سنه ولاسني

هامتك مرفوعة وجبينك عالى
أصيل من يومك ومتربى عالغالى
عمرك فى يوم مانسيت أهلك
لافى شبابك ولافى كهلك

حلوة يا زهرة بس دي خماسية مش رباعية

عموما ماشي

هيا حلوة كده

جميل يا أستاذ سعيد

واصل
ــــــــــــــــــــــــــــــــــ

نكمل

كسر الصراخ صوت السكات وانفجر

والظـلم لملم جنوده وانهزم واندحر

يا شعب ياللي السكات كاتم على انفاسك

هييجي يوم تقدر تزيل الحجر

معلتش يا استاذ على يمكن جنيت شوية بلح زياده
فاصبحت خماسية

رايح على فين والدنيا لفانى

والطبع دايما يميل للمظهر الفانى

ياما نفسى أصحى وافوق والزم طريق الزين

والدنيا فيها وفيها بس الكلام على مين

سعدنا بمشاركة الأستاذ أسامة

واصل معنا لأن عندك إحساس الشعر

ـــــــــــــــــــــــــــ

نكمل

نزل المطر غسل الشجر ف الشتا
فرح الشجر ضم الطيور البردانين
شجرة فؤادي بحزنها ليه ملفتة
مع إن ليها كتير كتير عاشقين ؟؟!!!!

نجيب منين كلام والكلام كله عندكم
مش حقد ولاحسد نتمنى نكون زيكم
ودى غيرة والغيرة عمرها ماتضر
كلمة واحدة من الحبايب لينا تسُر

رايد أنا للخير ما ناوى على غيره

ومنين طريق الخير يا اهلى دلونى

لا اهل ولا خلان فى طريقى يفيدونى

ما فايد الا العمل والقلب والنية

تَعَبت أشيـل الهَم عنّك وأداريك
وإنتَ همومـي ثقلَهَــا مـا يهمِّك

لا يا حبيبي .. الزمن لا يخليك
تقسى على قلبي وتسقيه سِمِّك

اسف ارجو قبول انسحابى من المسابقه
تقبلو تحياتى

ليه يا أستاذ ناجح ؟!!!!

كلامك المعسول يزيدك حلا
وقلبك الطيب بالخير اتملا
هموم الناس دايما همومك
ترضيهم لوحتى تبيع هدومك

كل الطيور رفرفت جوا الفضا العالي
وانا طير حبيس القفص أيام وليالي
أصدح وكل اللي يسمع يحسب اني سعيد
ولو عرف بلوتي يبكي على حالي

يا صاحبى قولى أيه جرى مالك
بقيت ليه حزين وتشكى حالك
دى أنت اللى كل الناس كانت ريحالك
تشكى لك همومها وتستنى نصايحك

ممكن اجرب لو تسمحوا ليا ؟؟؟

حب المنارة في قلبي ساكن
ملقيتش زيه في كل الاماكن
بضحك وببكي ومعاكم انا ساكن
بيكم وليكم الحب في قلبي ساكن

ماشي يا عم حماده

بس لازم تبدأ بآخر حرف انتهت بيه المساهمة السابقة

يا منارتنا يا ملتقي الابداع
علي عبدالله من اجمد الصناع
زهرة وصقرنا وابو جلال حس عالي في الابداع
اعضائنا الكرام هما اساس الارتفاع

تخيل مخدتش بالي من الحته دي ههههههه
وماله ابدء من جديد يا مديرنا الغالي

اخر مساهمه انتهت بحرف الكاف
نكمل عليها

كل زائر الينا ناظر
ومنارتنا في ابهي المناظر
تنظر اليها تتملي فيها تلاقي نفسك عليها ناظر
موضوعاتنا هادفه مش حب المظاهر

كده صح ولا عاوزين ايه ؟ هههه

رمضان جمعنا ويا الحبايب
فى المنارة كتلة واحده
لاحاقد ولاناقم يفرقنا الكل فى هدفه ساير
نصب عينه اسعاد الحبايب

بركان بيرمي حمم قلبي يا متغرب
سيبك بقى م الألم خلي الهنا يقرب
الرحلة دي للعدم واخداك بلا أوبة
وحبيبك اللي ظلم منك بيتهرب

» مسابقة شعرية في الرباعيات لأعضاء المنارة
» إعلان نتيجة مسابقة المنارة الشعرية في الرباعيات
» مسابقة شعرية شارك الان
» مسابقة المنارة الشعرية
» مسابقة المنارة الرمضانية الكبرى