عبقرينوووو المنارة واستجواب رمضانى

تحت أمرك ياأستاذ عبدالفتاح ننتظر حتى تنتهوا من الأكل بس رمضان مابيحبش الأكل الكتير

اولا حكايه اني ابو اخواتي دي انا برغم صغر سني قربتني منهم كتير جدا بصراحه
لاني حبيت انهم ميعرفوش يعني ايه حرمان من تواجد الاب يعني ايه ترابط اسري يعني ايه الصداقه
سني الصغير ساعدني كتير جدا اني اكون متواصل معاهم بشترك معاهم في كل شيئ مواكب العصر اللي هما فيه من تقدم وتكنولوجيا عارف كل واحد منهم بيفكر ازاي وفي ايه
ومن هنا يبدء دوري انا شخصياً لاني لفيت كتير جدا وعرفت كتير وصاحبت كتير وعرفت معادن الناس ومين اللي ينفع حد من اخواتي يصاحبه ومين الي ميفعش خبرتي في فن التعامل مع الناس نفعت جدا عرفت احمي اخواتي وخاصه الذكور من شر صحبة السوء لان مراحلهم العمريه ممكن تجبرهم علي الصداقه دي وميعرفوش مغزي الصداقه ايه
شباب وعاوز يجاري الامور ويكون زي فلان وفلان هو مش اقل منهم ولا هما احسن منه بدأت اتقرب من كل واحد علي حدا كل واحد له معامله خاصه جدا انا بكون صديقه فيها لاني من البدايه عرفت ميول كل منهم وايه هواياتهم وايه اللي بيحبه وايه الي بيكرهه ومن هنا كونت مدخل لكل شخصيه فيهم وسعيت اني انمي نفسي مع كل واحد فيهم واشاركه في هواياته وفي طريقه تفكيره علشان اكون قريب منهم ونفعت الحمدلله اني قربت منهم وقدرت احميهم من تلك الصداقات وبالاقناع هذا الاسلوب المتبع معاهم اما ان تقنعني بوجهه نظرك او اما تقتنع وليس بالامر ولكن بالحب والاقناع وشرط وجود دليل حتي يكون مقتنع تماماً وميقولش في سر باله هو هيعيش عليا دور الكبير ؟
دائماً كنت حريص علي اني انقل ليهم تجارب انا مريت بيها والنتائج اللي طلعت بيها
المراحل بتاعتهم حالياً بتعرفهم علي اشياء لم تكن موجوده في ايام مرت من سنين بالنسبه ليا لكن مع التطور الشديد اللي بنعيشه الواحد عارف يعني ايه اختلاط ويعني ايه انك تقدر تسيطر علي اخوك او اختك بدون ماتزعله ودون ماتجرح شعورة بالعكس لما بقربهم مني ويكون في مشكله او مشورة خاصه جدا بيحبوا يتكلموا معايا بس اللحظه دي بكون معاهم بروح الصديق ومداعبته ومشاركته اسراره وبقلب الاخ ومشاعره ومشاعر الخوف عليه وبحكمة الاب والتريث في اتخاذ القرار وشروط النفاذ بالاقناع .

صداقاتي في مراحل العمر تنقسم الي جزئين
الجزء الاول في الاقصر مرحلة الطفوله اتخذت منها اجمل اصدقاء وفي الاخر طلعت منها بصديقين علي حق بمعني الكلمه لان هناك فرق بين الصديق والصاحب
الصديق من يصدقك القول والصاحب دا بالنسبه ليا معرفه وقت ومفيش اختلاط مؤثر في الحياه
وكان شكل الصداقه في الجزء الاول هو ان الاتنين دول كل حياتي بحس معاهم بالامان بالراحه النفسيه كنا بنعيش في بيت اي واحد فينا الام للصديق هي امي اكن لها التقدير والاحترام واشعر بحنان الام وانا معه في منزله ومازلت حتي الان اناديهم بلقب امي كلما ذهبت الي الاقصر وخاصه مركز ارمنت اللي انا اتربيت فيه وهو موطني الاصلي
اما الجزء الثاني من مراحل الصداقه عاصرته هنا في القاهرة وخرجت منه ب3 اصدقاء فقط لانهم يعلمون معني الكلمه جيداً ونشأتهم في صعيد مصر وبالتحديد سوهاج
اما الصداقات الاخري فلا اعترف بها نهائياً علي ارض الواقع معي لان معظم الشباب في القاهرة صاحب وصاحب لمصلحه ليس لمعني الصداقه فأختصرت الطريق تماماً وعاملتهم بنفس المعامله وهناك شيئ اخر وهو الزماله ولها معاني كثيره ايضاً
وشكل الصداقه هنا ؟؟؟ اضع تحته خطوط وفواصل حمراء وعلامات تعجب واستفهام
لاني بصدق وامانه بميل للصداقه التي يغلب عليها الطبع الصعيدي لانهم يعلمون العادات والتقاليد ويعرفون معني الكلمه ومعني كلمة رجوله

زي ماقلت زهرة مش من الصعيد او ممكن تفسير اخر هي من الصعيد ولكن نشأت في البندر ههههههههه
والمش يحلي ولا يبقاله طعم من غير البصل ؟
وخاصه بعد صلاة الجمعه مع السلطه والبطاطس المحمرة هههههه
والله كانت ايام حلوه جدا ياريت تعود
بس مش بكل مافيها للتنويه يعني ههههه

الامر لله يا استاذ/سعيد

اصل الاستاذ/ حماده

راجل ظريف جدا

وموضوع استضافته

لازم يكون فيها شئ من الطرافه

ورمضان ميحبش الاكل زي ما قلت بس يحب السهر

..............

يعني ايه يا زهره عاوزه تسالي عن العصيده؟؟

منا قلت لك كل الطرق تؤدي الي روما

كل الطرق تؤدي الي المعده ههههه
وكله في الاخر مكوناته واحده يام شروق مع اختلاف المسميات

انا ساكته اهوه

سالت سؤال من ربع ساعه
والظاهر ما اتعملهوش ارسال

امتى ابتديت تصوم بجد ؟
كلمنا عن ذكرياتك الرماضانيه فى الطفولة

ابتديت اصوم بجد وانا في سن 8 سنوات وكان الفضل لله سبحانه وتعالي وبعد كده لجدي للاب
هو اللي علمني الصوم وحببه ليا كان دايماً يقولي لو صمت النهارده لحد الساعه 10 هتكون ولد وهديلك 10 ساغ
كان بيضحك عليا ويحفذني يعني ههههه
وكنت فعلا بصوم علشان اخد ال10 ساغ واغيظ بيها ولاد عمي لان العشرة ساغ كانت كبيرة والله ومش اي حد بياخد المبلغ دا الا العبد الفقير لله كنت الوحيد اللي بينول المبلغ دا لاني كنت بالنسبه لجدي حاله خاصه جدا
وبعد كده بدأت فعلا بالصوم لفترات طويله ولما كبرت وبقي سني 12 سنه اكملت اليوم بالكامل والحمد لله لكن اقف هنا لحظات واراجع زكرياتي وانا في المرحله الثانويه كان معايا اصحاب السوء وكانوا دايما يعملوا حالة خروج عن المألوف ونجحوا انهم يضموني معاهم لفتره كانوا يفطروا جهراً في عز الايام المفترجه كنوع من اثبات انهم رجال وانا لاانكر كنت معهم وكانت تلك التجربه الاولي لي في التدخين كنا نفطر من اجل التدخين وكنا نعتبرها رجوله الي ان شاء الله وابتعدت عن تلك الصحبه بتوجيه من الوالد لانه لاحظ اني بدأت في اتباع خطوات ليست من عاداتنا وهي سماع الكاسيت بصوت مرتفع دائماً اغلق باب غرفتي لساعات طويله بدء ييشتم رائحه الدخان وكان العقاب شديد جداً قد ابرحني ضرباً كما يقال هههههه
واعاد توجيهي للعادات والتقاليد وان معني الرجوله ليس في التدخين كلمة رجل لها معاني كبيرة ولن تقتصر علي اني اقلد فلان واتبع فلان وحرمني من المصروف لمده تجاوزت الشهر كنوع من العقاب حتي لااعود لتلك العاده السيئه
وبالرغم من ذلك عدت لها في الكبر ههههه
اما زكريات الطفوله في رمضان لها اجمل الذكريا ت في نفسي عندما تجتمع الاسرة علي مائدة الافطار ونتبادل اطراف الحديث مع الاستماع الي السيرة الهلاليه في المذياع اي الراديو وضربات المدافع المصنوعه من الحديد مصنوعه يدويا
كنا نمرح ونلهوا وياسلام علي الفرحه لما حد فينا يجيله فانوس يااااااااه كان يبقي ايه كل الاطفال يجتمعوا حواليه ويلبوا معاه ويصاحبوه علي اساس انه هيدي لكل واحد لعبه معاه وكانت تجمعنا لعبة كرة القدم في ساعة العصاري خلف المنازل وناهيك علي اللي كان بيحصل من الامهات ههههه زعيق وشخط وامشوا العبو بعيد والكلام المعتاد بس كان له طعم اننا بنجتمع كلنا كأطفال العيله والجيرة ونلعب ويجمعنا شيئ واحد والاجمل من ده كله كان المسحراتي فاكر ياعم عبدالفتاح السحراتي اللي كلمتنا عنه
دا بقي في حد ذاته حكايه لوحدها كنا لازم ننام بدري علشان نصحي لما المسحراتي يعدي ونفضل نقوله نادي بأسم فلان كان لما ينادي ويتغني بالاسماء وكل اسم في موال جميل وسبحان الله كان يرتب الموال علي اسم كل واحد منا والله بطريقه لن تتكرر ابداً كل واحد له موال مختلف ومقوله اخري تفرق عن الاخر اما الان لالالا والف لا لن يعود رمضان بشكله القديم ومميزاته وبهجته ولكن نفرح به كمسلمين انا اتحدث عن الطفوله في رمضان هو بالنسبه لينا دلوقتي شهر عظيم وبننتظره من العام للاخر ولكن ليس بفرحة زماااان والاحساس الجميل الذي كنا نمتلكه كأطفال

حبيب قلبى/ابو حسام

خلى بالكم انا موجود معاكم بس مش عايز اتكلم احسن اغير مجرى الحديث

لانى مستمتع بحديث ابو شحات العفوى الذى يفوح منه الصدق

وبعدين انا لا عايز كرك ولاعصيده انا عايز كوبايه شاى صعيدى حبر

يا حماده
انت سنك صغير
وانا اكبر منك وما شوفتش المسحراتى ده
تقدر تقوللى ازاى
انا فاكره ان حكاية المسحراتى دى كانت فى الستينات مثلا وراحت لحاها

ابو شريكو
ههههههههههههه قصدي حبيبي الغالي كما نطلق عليه شاعر المنارة وفارس بني هلال
اسعدني جدا تشريفك وحضورك المميز للحديث وتقدر تسئل زي ماتحب انا تحت امرك ومعانا مذيعه ومحاورة ديمقراطيه جدا وهرياني اسئلة ههههههه

بصي يا ام شروق المسحراتي كان موجود لحد سنه 92 تقريباً
وكان بيلف علي كل الحواري وكل البيوت والغريبه سبحان الله كان بيقي حافظ اسماء الاشخاص الي في القريه كلهم واحد واحد وينادي عليه بأسمه اصحي يافلان ويقول موال عليه
او بيت شعر من من اللي هما بيسموه فن الارتجال علي ما اعتقد
لديه موهبه اعطاها ليه الخالق وهي في نفس الوقت اكل عيشه موسم من السنه للسنه بيطلع فيها بحسنه كويسه احنا هنحسد الناس ولا ايه ؟ ههههه
المهم مكانش من زمااان قوي ولاحاجه لاني عاصرته ومازال المسحراتي موجود لحد الوقت الحالي حتي هنا في القاهرة موجود وكل يوم يلف ويدور مع اختلاف الزمن دلوقتي كل اللي بيقوله كلمتين اصحي يافلان ووحد الرحمن او وحد الدايم
فين زماااااااااان لما كان الفن حتي في طريقة الالقاء كان ليها طعم خاص وياسلام لو شفتيه هو وبيقول الموال علي الربابا ووراه واحد مساعد ليه علي الدف تحفه فنيه والله بس الربابا كانت بتظهر قبل العيد بيومين تلاته بالكتير علشان يلم الغله هههههه دلوقتي بيطلب بلسانه فلوس ياعم والله احنا صاحيين خلقه يقولك كل سنه وانت طيب ماليش فيه هتجيب العيديه يعني هتجيبها رضيت ام ابيت هههه

السلام عليكم ورحمة الله وبركاته
معلهش يا أستاذ حمادة أنا حاولت أدخل في الحوار ولكن
المديدة والعصيدة نسوني الشفع والوتر والأمر من كده المش اللي جيباه أم شروق

والمديدة تكون بالملح أجمل أما العصيدة لازم تكون بالعسل معلهش أنا خبرة عليكم قي الحاجات دي

الله يرحم أيام زمان كانت جميلة قوي

طلعت انا الهبله
اللى لا تعرف مديده ولا عصيد
ما علينا
بمناسبة المش
بيقولوا صعيدى قعد ياكل مش
ونسى يسمى
دخل على الطبق الثانى
والثالث وهو ناسى يسمى
وفى الرابع
ابليس قال له سمى يا ابن العبيطه
حرقت قلبى

معقوله؟؟؟؟؟؟؟؟؟؟

صاحب قعدت العرب

مش عارفين تجيبوا له كباية شاي؟؟

منور والله ياشاعر المنارة

الاستاذ/ سيد بسيوني
الاخ الاكبر والاستاذ الجليل
حضرتك نورت الحوار واثلجت قلوبنا بكلماتك الجميله لكن المديده والعصيده مازالت ممكن تتعمل لحد الان والله لسه مصدرش قرار بمنعها
عارف حضرتك لو حد عملها هنا في القاهرة هيقول ايه دا ممكن يفكروا انها متفجرات
فاكر حضرتك المفروكه ؟؟ يلا مهي ليله الاكلات القديمة وكان في حاجه كمان كانوا يطلقون عليها في بعض البلدان من الصعيد المبوخيه هو الاسم غريب بس الطعم لذيذ زي السرسوب كده مثلا ممكن ام شروق متعرفهوش ههههه

منور الدنيا يا استاذ/سيد والله

لكن الناس فيما يصنعون مذاهب

مرحبا بك معنا في هذا البث الحي

وعبقرينووووووووووالمنارة

ولا حرف من الاكلات دى انا عارفاه
وبرضه مش حاسأل
وكوباية الشاى على النار يا شاعر بنى هلال

ليه بس ياحماده بتفكرنا

خلينا ساكتين

علي فكره المبوخيه

بوضع شده مفتوحه علي الواو

خوفا من الخطا في القراءه

الله عليك ياصقر المنارة انا قلت لازم نشوف حل للموضوع بتاع التشكيل علي الحروف هنقترح الموضوع ده علي الساده المسئولين علشان متغيرش معاني الكلمات تسلم ياصقر المنارة وفين الشاي يازهرة انا جبته اهو علشان درش والاستاذ سيد كمان يشربوا معانا
ولا اقولك قدميه انتي انا راجل ضيف دلوقتي ههههههه

ياعم مانت قولت قبل كده هنشوف الموضوع ده

ولا سالت تاني

بس لازم يكون فيه حل

الشاي فين مدفع الامساك ضرب

ولا خلييها بكره؟؟؟

متهيئلي وسكتت زهرة عن الكلام المباح عقب قيام الديك بالصياح
ههههههههه

لا لسه لم اسكت
انتو ناويين تقعدوا للصبح ولا ايه

والله زي ماتحبوا انا تحت الامر بكره اجازة والحمدلله والقعده معاكم مشبعتش منها زي العسل زي منتي قلتي في البدايه
وخاصه في وجود صقر المنارة اللي محيرني لانه لسه مسئلش وخايف من اسئلته جدا ههههههههه

الدنيا كلها منورة بيك يا أستاذ عبد الفتاح وكل سنة وأنت طيب
وبقول لأبو حسام كل الأنواع مرت عليّ ولو عايز مبوخية أو مفروكة
حالا تكون عندك يا غالي

حبيب الجميع الاستاذ سيد باشا
ربنا مايحرمنا من كرمك الحاتمي علي رأي استاذنا عبدالباسط
عارف هي لو شويه مفروكه كده تبقي رضا هههههه علشان ريقنا سال واحنا لسه بنقول ياهادي في الصيام
ربنا يبارك لنا في حضرتك

» حوار رمضانى شيق مع الاستاذ عبد الفتاح
» معا من أجل المنارة
» فضل المنارة
» عبر عن مواجيدك هنا فى المنارة
» الى كل محبى المنارة