الخروف العربي

موضوع: الخروف العربي 15/10/2009, 11:18 am

حكى انه في ليلة العيد إجتمع داخل عنبر الأضاحي التابع للمجزر الموجود في منطقة المناسك ب (مني) ثلاث خراف من سلالات وبلاد مختلفة ….
خروف إسترالي وخروف صومالي وآخر عربي ….
كان جو العنبر ملييء بتشكيلة من المشاعر المتضاربة التي انتابت الخراف في إنتظار نهايتهم المحتومة صباح غد بعد أن يفرغ الحجاج من رمي جمرة العقبة الكبري …..
جلس الخروف الإسترالي بصوفه اللامع ونظافته العالية وجسمه المتناسق في ركن العنبر وقد بدا عليه الحزن الشديد و الخوف مما سيحدث غداً وتذكر الأيام الخوالي عندما كان يرتع في المزارع الخضراء الشاسعة ويشرب من عيون المياة العذبة ويندب حظه أن تكون نهايته مع جزار أجنبي وفي بلد غريب عنه وفي عنبر بهذا المستوي ….
بينما كان الخروف الصومالي أقل حزناً وإضطراباً وكان يتمتم بكلمات غير مفهومة بينما كان الخروف العربي في غاية السعادة والسرور ويتنطط يميناً ويساراً يقفز علي طوّالة العلف ومنها علي أحواض الماء محدثاً جلبة وضجيجاً شديداً وهنا خرج الخروف الإسترالي عن شعوره فصاح في وجهه … تصدق بإيه …. إنت خروف ما عندكش ريحة الدم …؟!
كلها كام ساعة وحنتدبح وإنت قاعد تتنطط … مش تقعد تكتب وصيتك ولا تعمل حاجة مفيدة ….
نظر الخروف العربي نظرة كلها إستهتار وقال أنا ما عنديش دم … !! بكره حتتفرج عليا وأنا بندبح وحتلاقي عندي دم للركب ..هههههههههه ….
دخل الخروف الصومالي في الحوار بتلقائية مدهشة ووجه كلامه للخروف الإسترالي وقال له:
سيبك منه …
دي خرفان متربية علي البلادة والتناحة والرحرحة حتي بص علي ليته … فيه خروف في الدنيا دي كلها ليته أكثر من ربع وزنه ..!!
دي تعملها 12 ولا 13 كيلو كل ده من القعدة والتختخة …!!!
أحس الخروف العربي بالإهانة وأنه أصبح فرجة فنظر للخروف الصومالي وقال له مش ناقص إلا إنت يا مسلوع تتكلم … إنتم عندكم لما تاكلوا ذرة بتعملوا فرح … إنتم خرفان جعانة وجربانة … إنت نسيت إنك عربي إنت كمان … ولا عشت الدور إنك إفريقي …
تغير وجه الخروف الصومالي وتحرك بسرعة تجاه الخروف العربي محاولاً نطحه …فوقف الإسترالي بينهما … صاح الخروف الصومالي قائلاً:
مسلوع آه …. بس حر … أنا خروف حر …
أظن إنت ما تعرفش أصلاً معني كلمة حر …!!
عمرنا ما نرضي بالذل أبداً .. شوف أكبر دولة في العالم …
أمريكا إللي إنتم لما بتسمعوا إسمها بس …بيحصلكوا إيه ومستضيفينها في بلادكم … إحنا سحلنا جنودها في شوارعنا وخرجت من بلادنا في أيام …. حاول الخروف العربي بالرد ..ففوجي بالخروف الإسترالي يقول له شايف الباب الإستانلس بتاع العنبر هناك …روح بص فيه وشوف منظرك .. حالتك ما يعلم بيها إلا ربنا …. عيب تتنقوز علي خروف صومالي غلبان … لو عنده نصف إللي عندكم كان زمانه ملك عندكم ..!!
بلادكم كلها خير وبترول وأنهار وآثار ومعادن … وحالكم عجب …؟؟ روح بص شوف قرونك الكبيرة علي الفاضي تنطح بيها زميّلك وجيرانك بس … بس لما يجي ذئب نحيتك تفتح له الباب وتطفي له النور علشان يأكلك في جو رومانسي وشاعري … ولا المأمأة….ما نسمعش لك صوت ولا نسمع لك مأمأة إلا لما تكون عايز تأكل أو تشرب …ده يا خروف …حتي صوفك … مش عارف تحلقوا …. إحنا في إستراليا بيحلقوا لي خمس أو ست مرات علشان يستفيدوا به ويأكلوني بثمنه … بآكل بثمن صوفي … مش مقضيها نوم … ولا مستنيين خبرات أجنبية تحلق لكم الصوف بتاعكم وتديلكم نسبة 5% من ثمنه …زي البترول والثروات إللي في بلادكم وبيستخروجها ويتمتع بيها غيركم …. غمز الخروف الصومالي للأسترالي وقال له بصوت منخفض كفاية كده عليه إنت نفضته علي الآخر حرام عليك … رد الإسترالي وقال … حرام إيه دي خرفان باردة وأنا عارفها ولا يأثر فيها الكلام …عايزه تتريق علي خلق الله وتأكل وتشرب وتعمل شقاوة وخلاص …. تتربط في عمود نور في الشارع ماشي ….تتحط فوق بعضها في شادرمتر في متر … ما تقولش لأه ….إلتفت الخروف العربي لهم وقال بتتكلموا ليه في السر … يا عنبر ما فيهوش خروف راجل … إللي شايف نفسه يجي لي هنا … ضحك الخروف الإسترالي ونظر للصومالي وقال له شفت مش لسه قايل لك خرفان فنجرية بق … سمع الحوار الخروف العربي وقال بصوت عالي أشبه بالصراخ … بق إيه يا خرفان ناقصة وبصوفه دايبة …. شووووبش … يا إبر مصدية … في أكوام مرمية …. يا خرفان صدمانة … يا خرفان عدمانه …. يا نداغة اللبان … !!!
إنتم فاكرين نفسكم إيه … ده أنا البلدي والبلدي يوكل …. إنتم لحمكم لا طعم ولا ريحة … ولا حتي لون … نظر الخروف الإسترالي إليه بإستغراب وقال هو ده الرد … ده كبر لية يا مدهنن ..!! خليك موضوعي في ردك … يوكل …. ما هو بيأكل عمال علي بطال …. علي المشاع …. بيأكل بدون ثمن … إحنا بنوكل برضه بس بمزاجنا وبثمن …. مش نوكل مجاناً وضرب علي القرون …!!! وبعدين إنت كنت توكل زمان أيام الخير والعز …. أيام البرسيم بتاع الرز …. مش البرسيم المسرطن بتاع اليومين دول ….!!
وبعدين بص يا خروف يا عربي … إحنا لما بندبح بيأكلنا الغني والفقير من حر ماله …. إنت مين بيشتريك …. !! إنت الفقراء بيكلوك صدقات بس … يعني توكل بطريقة طبقية ليس فيها عدل …!! وبعدين إحنا في إستراليا أخذنا قرار إن ما فيش خروف واحد من عندنا يروح بلادكم من الهوان إللي شافوه عندكم ….
فجأة فتح باب العنبر وظهر جزار ضخم الجثة ذوشعر أصفر وعيون زرقاء..!
ومعه مساعده … وقال له واد يا كرشة … نبدأ بمين … ؟؟
قالو إللي تشوفه يا معلمي …. تجول المعلم في جنبات العنبر … فوجد الخروف العربي يمشي متبختراً بليته الغنية ولا يبالي بما يحدث حوله ولابنظرات الجزار له … صاح الجزار وقال كرشه …. هات لي الخروف العربي ده شوربته حلوه … وليته أحلي ….!!
بسم الله …. الله أكبر …. كده بقت الذبيحة شرعي … علشان نعرف نبيعها …!

» الخروف المشوى ى ى ى وصل
» ذبح+سلخ+تقطيع الخروف (صور مفصله)
» حكايات الخروف في الصعيد
» المدرس العربي
» من عجائب الشعر العربي