شعر مصاطب اتفضل قول

موضوع: رد: شعر مصاطب اتفضل قول 23/6/2010, 9:31 am

انت اللي بتشجعني اكتب يا حمادة
وليك في قلبي محبة وغلاوة
و انا سعيد بكلامك اكتر من اللي بكتبه
والحمد لله ما ألفتش غير البيتين بتوعك والباقي شوية من الشاعر عبدالستار سليم وصلاح جاهين واي بيتين شعر حفظتهم من اصحابي اما تأليفي فهو
ده كلام على الريق
مش تقول خد وهات
ولعتلي المحاريق
يا حمادة شحات
الأهلي احسن فريق
خلى الزمالك مات

ده

موضوع: رد: شعر مصاطب اتفضل قول 25/6/2010, 7:43 pm

بالمقسوم عيش وارضا بالمقسوم
تبكي وتقولي مقادر واحكام علينا ومقادير
في اللوح رزقك مقدر متعيش وارضا بالمقسوم

قدمك علي الدنيا بالسلف
وايديك بتنصرف بس الاف
تشكي وتقولي بتسلف
متعيش وارضا بالمقسوم

موضوع: رد: شعر مصاطب اتفضل قول 25/6/2010, 7:54 pm

امشي علي قدك متمدش
تشفي جروحك متمدش
وللغير ايدك متمدش
متعيش وارضا بالمقسوم

لو الزول يرضي بنصيبه
لكانت كل الناس ترتاح
طمع القلوب اللي في الناس للقلوب سبب جراح
دي اللي زرعه انناس حاسد اللي زرعه تفاح
زاد الكيل لما طفح الكاس
زاد البكاء وزاد النواح
ياناس مال الناس كل ناس ورا منه متشوفش افراح
تلوم عليهم تتحير متلاقيش منهم امان
بيقولوا الزمن اتغير
لا
الزمان هو الزمان
كل اللي حاصل هنقوله
بالحاصل انا مش راضي
تلقي اللي يتعجبن بطوله يخطي الخطي فوق العادي
مناه النجم يطوله ويبقي صاحب اراضي
يروح لغيره يدق الباب
وبأيده فوق الشيك ماضي
وللديون يفتح حساب شهرين ويبقي الجيب فاضي
مسددش حسب الميعاد والشكوي توصل للقاضي
يأبي الميا ويأبي الزاد وبيبكي يقول يا اولادي
العزول واقف له بالمرصاد مشمت فيه كل الوادي
القاضي يدلي بالاحكام مدان ومن راح يسيبه
يحكم بسجنه كزا عام وقضبان السجن تصيبه
نصيحه كل الناس ترتاح لو الزول يرضي بنصيبه

موضوع: رد: شعر مصاطب اتفضل قول 26/6/2010, 7:35 pm

الليـل مـا هـو قصير
إلا على اللى يـنامـه
والشخـص مادام فقير
ما حد يسمـع كلامه

موضوع: رد: شعر مصاطب اتفضل قول 26/6/2010, 7:40 pm

جوني الطبابا مع الدون
صبحوا العوازل في راحه
قلت مشيك مع الدون
فيها مكسب وراحه

موضوع: رد: شعر مصاطب اتفضل قول 26/6/2010, 7:41 pm

انا بقول لك يابني
اسس قبل ماتبني
مشي الردي الي تعبني
يتعاشر راجل يابلاش

موضوع: رد: شعر مصاطب اتفضل قول 29/6/2010, 9:31 pm

صبرت ياغفلان لما الموت طرق بابك
تضحك وتلعب ونسيت يا فتي احباباك
متقوم دور علي باقي العمر وشبابك
امانه يا اسود العين انا قاتلني فيك الاوجاع
واداي ملك الموت نازل كل يوم في جاه
تعمل للغني جاه وتقفل علي الفقير بابك

موضوع: رد: شعر مصاطب اتفضل قول 29/6/2010, 10:03 pm

اب اتاه المرض يخاطب ابنته قال
يابت لو كان رقادى تعبكى
لمى حبابك وتعالى ابكى
قالت
والله يابا رقادك ماتعبنى
ولا تعب الليالى عدانى
يابا كل اللى تعبنى
ان الهلف كل اللى بنيته
يهده تانى

موضوع: رد: شعر مصاطب اتفضل قول 29/6/2010, 10:09 pm

عيان ياطبيب وفي الم وعاوز طب يسندني
علي قلة جدع زين اذا مال الزمان يسندني
انا لما كان معاي مال كان المال يسندني
انادي واقول ياولد القي 200 تسندني
لم خف جيبي من المال مش لاقي ولا حد
يسندني
سبلت شكوايا لله هو اللي يسندني

موضوع: رد: شعر مصاطب اتفضل قول 29/6/2010, 10:22 pm

يعيرون الزوجة بزوجها

جمل الصبية ماشى يهد هد
وتاه فى دروب الحواشى

بعيه يازينة الخد
وهاتى بتمنه مواشى

قالت

لجمل الصبية لماشى يهد هد
ولا تاه فى دروب الحواشى

اذاهدر يهدهد ياكل عليقكم يامواشى

موضوع: رد: شعر مصاطب اتفضل قول 29/6/2010, 10:52 pm

اه اه ياعمنا
نزلت سوق الجمال بتعاين علي جملين
سمعت دلال بينادي علي جملين
لقيت المولد وطي وسوق الجلب ذاد علي الجملين
انا قمت بالعين لقيت جمل اصيل عما بيبكي
بخدود سمر عجبوني
برقبه طويله رفيع الوصف عجبوني
قلبت في اديه قال مكتوب عجبوني "علي جبينه"
بكي الولد وقال اه يا 100 ندامه
علي السوق قال الاصيل مافيهوش اتباعك
انا لما كنت بصحتي
كانت تمشي في قفاي اتباعك
شوف السوق لما اتنصب
صبح الواطي يتباعك " يتابعك " وعجبي

موضوع: رد: شعر مصاطب اتفضل قول 30/6/2010, 2:05 am

حبيبتى من عامين ثقافة ومتعة واثارة
عشاقها بالملايين ليها العيون سهرانة
تسعد اى حزين هجرها فرقة ومرارة
كلنا اكيد شاهدين حبيبتى دشنا المنارة

موضوع: رد: شعر مصاطب اتفضل قول 30/6/2010, 2:13 am

الله عليك يابوسيف

انا الي حملت قلبي النيران وهجات واهجات

من مصر لسكندريه يارب سلم

تعلي يابوسيف سلم

علي ناس كانت ف الغربه واهي جات

موضوع: رد: شعر مصاطب اتفضل قول 30/6/2010, 10:33 pm

حمدلله علي السلامه ياجي من السفر
ياعم عبدالفتاح وحشتنا ياقمر

طير من عشه في يوم فر
وجهي من الهموم صفر
سألت عليه قالوا مسافر
ضراب الودع وقالك ايه

موضوع: رد: شعر مصاطب اتفضل قول 9/7/2010, 1:34 pm

من يومه قليل الاصل ياجى ويغلط هنا
اما الاصيل عمره مايبتدى الغلط هنا
ياناس هتلمو ولدكم ولا اقوم اربطو انا

موضوع: رد: شعر مصاطب اتفضل قول 9/7/2010, 8:42 pm

الليـل مـا هـو قصير
إلا على اللى يـنامـه
والشخـص مادام فقير
ما حد يسمـع كلامه

موضوع: رد: شعر مصاطب اتفضل قول 10/7/2010, 3:10 am

موضوع اكثر من الرائع بارك الله فيك يا استاذ/محمد عبادى

ومشاركات جميله جدا من اعضاء اجمل

واستكمالا لحديث الاستاذ/خالد الشويخى

فان هذا الفن يسمى بفن الواو والذى يعتمد على المربعات الشعريه

بمعنى ان تكون الكلمات متقاربه فى النطق ولكن مختلفه المعنى

وتنتهى القصيده او المربع بمثل ما بدائت به

والاستاذ والشاعر الكبير/عبد الستار سليم

اكثر من ابدع فى هذا الفن وكانت له قضيه شهيره مع المطرب مصطفى كامل

الذى سرق منه المربع الشعرى وحوله الى اغنيه التى تقول

عينى رات سرب غزلان فيهم غزاله شريده

انا قلبى لما اتنغز لان

شاور وقالى شاريده

وقد كسب القضيه الشاعر عبد الستار سليم الذى ينتمى الى مدينه نجع حمادى

وحاز مؤخرا على جائزه الدوله التشجيعيه عن كتابه الشعرى مزامير العصر الخلفى

وقد كنا من سعداء الحظ عندما التقينا به فى ندوه بقصر ثقافه دشنا

وقد اهدانا كتابه فن الواو ذلك الشعر الذى نحن بصدده الان

واعتبر نفسى استفدت من خبرته فى هذا الفن

الذى يرجع بدايته الى الشاعر/ابن عروس

وهذه المشاركه اول محاوله منى فى كتابه فن الواو بعنوان

الحاوى

ياما ف الجاب يا حاوى وياما ف الليالى حكاوى

زى مايدارينا ضلام الليل بتدارى برضه البدله بلاوى

كش ملك.....مات الملك.....جابو الولد

كوتشينه والله يا بلد000كوتشينه من غير الولد

البنت بتقش الولد0000مش كل دكتور بيداوى

ياما ف الجاب يا حاوى وياما ف الليالى حكاوى

زى مايدارينا ضلام الليل بتدارى برضه البدله بلاوى

شباب ملقب با العاطل000قتلوه وقالو انه القاتل

جواز عتريس من فؤاده باطل000لسانا بندفع ف اتاوى

ياما ف الجاب يا حاوى وياما ف الليالى حكاوى

زى مايدارينا ضلام الليل بتدارى برضه البدله بلاوى

محكمه0000000حكمنا نحن بالبراه وعلى القتيل دفع الرسوم

الناس دى ممتتش من الغرق الناس دى ماتت م الهموم

قبل اما تطلع من بلادها طلعت فى الاول م الهدوم

وانسى ياعم بلا شكاوى

ياما ف الجاب يا حاوى وياما ف الليالى حكاوى

زى مايدارينا ضلام الليل بتدارى برضه البدله بلاوى

قالو عصر الانفتاح وبلادنا عرضوها ف مزاد

بيع ياعم بيع ياخال000كله فايده للبلاد00كله فايده للعباد

بكره يتباعو العباد00000بس يتباعو رخيص

اصل احنا سلعه ولا تساوى

ياما ف الجاب يا حاوى وياما ف الليالى حكاوى

زى مايدارينا ضلام الليل بتدارى برضه البدله بلاوى

الضاحك الباكى@ مصطفى عدلى

موضوع: رد: شعر مصاطب اتفضل قول 10/7/2010, 1:19 pm

واد من بلدنا طلع بره وجاب معاه كام ألف جنيه
كان قبل مايسافر عره والشحاتين بيحنوا عليه
والفقر جابه رماه ونفاه وكل واحد شافه جافاه
والقمل بانى بيوت فى قفاه والبق عامل فيه أبونيه
ولما عمره عدى وتاه رجع لبلده قفاه فى عينيه
وشله من الاشرار صاحبوه ونطقوه بكتشى بيليه
وياريت على الخير بيدلوه ويعرفوه المفروض ايه
الجزمه لو تتعبى فلوس جزمه فى وحل الطين بتدوس
عمر الفلوس ما بترفع روس ونفوس عزيزه مايذلها ايه

كلمات المرحوم الشاعر\محمد السيسى
أبو حماد شرقيه

موضوع: رد: شعر مصاطب اتفضل قول 10/7/2010, 2:15 pm

استاذ مصطفى اشكر مرورك
وتشريفك للموضوع بكلمات ط
رقيقات كما اشكر اضافتك لفن
الواو
والشكر موصول للاخ خالد الشويخى
لاضافته للشاعر عبد الستار سليم
ولو انالشكر متاخر وعذرى ان
عند مشاركة الاخ خالد كان النت
فاصل عندى
كما اشكر كل الا خوة الذين شاركو
فى احياء هذا الفن الذى كاد ان يندثر
وارجو الاستمرارية من جميع الاخوة والاخوات

# ياللى غويت الفن#
ياللى غويت الفن
وبتقول انا فنان
داحنا الفن ربباته
وعاشقينه من زمان
بنسهر الليل عشان
نقول الغنوة والموال
دا اللى يعشق الفن
عيونه دايما صاحية
وقلبه لايهدى ولاينام
داالفن دابحره غويط
واسع الترحال
دا الفن دا موهبة
وهبة من عند الرحمان
ياللى غويت الفن
وبتقول انا فنان
داالفن احنا ربباته
وعاشقينه من زمان

موضوع: رد: شعر مصاطب اتفضل قول 10/7/2010, 4:35 pm

سكت الهَوى والناموس طار
والسبع طاطا بعينه
خليه دا النومِ أستار
لما الكلب ياخد يومينه

موضوع: رد: شعر مصاطب اتفضل قول 11/7/2010, 3:19 am

ياصبيه ليه بتحنى الكف متبصى تانى خلفيكى

ماهو كل ماله الجيب بيخف وشبابنا عمره ماخال فيكى

زى الطاحونه فى ساقيه نلف احنا يا دنيا خيل فيكى

مصطفى عدلى

موضوع: رد: شعر مصاطب اتفضل قول 12/7/2010, 1:31 am

كترت فوانيسها والكلبات
ودى الحديد على السكة ماشى
شفت الولد اللى لاليها اب ولا خال
فى الضلة فرطو الشماسى

موضوع: رد: شعر مصاطب اتفضل قول 19/7/2010, 10:08 pm

اين انتم ياشعراء المصاطب

رحتو فين

موضوع: رد: شعر مصاطب اتفضل قول 20/7/2010, 1:57 pm

خسيس قال للاصيل تعالى اشتغل عندنا خدام

تاكل وتشرب وتبقى من جملة الخدام

قال الاصيل انا اطلع فوق جبل عالى تاكلنى حدا وغربان

ولا يقولوا الاصيل عند الخسيس خدام

موضوع: رد: شعر مصاطب اتفضل قول 21/7/2010, 8:51 pm

عيان يانا س عيان
متقلبوش فيا
تسعة وتسعين دكتور
غير التمرجية
يا مسافر خدنى معاك
تكسب صواب فيا
مابين الحق والباطل
تاه الدليل بيا

» صور تحير العقل والنظر اتفضل جرب بنفسك
» من روائع الرسم علي الارض اتفضل شوف بنفسك الابداع
» أنت مطلوب بالاسم اتفضل ادخل للمسابقة الثقافية الاولي
» نتابع كل ماهو جديد في المنارة اخيراً افلام رعب لكل محبيها اتفضل معانا