مساجلة شعرية بين الأستاذ صلاح النجار و المهندس حمادة شحات

تبدأ اليوم ثاني المساجلات الشعرية

وستكون بين الأستاذ صلاح النجار و المهندس حمادة شحات

وستكون مقتصرة عليهما وعلى باقي الأعضاء عدم الرد

تنتهي هذه المساجلة يوم الخميس القادم

ابدأا على بركة الله

موفقين

كان نفسي تكون موجود استاذنا لتبدء حضرتك
وانول الشرف بعدك

ياسلام علي الدنيا ياعمي والايام وافعالها

ماتسيبش الواحد في حاله وبتئذيه بأفعالها

هي كدا مع حماده دايماً بتوريه أفعالها

توجني المدير بشرف المنافسه معاك وفعلها

اصل المحبه الوداد وكل شيئ مكتوب

الرزق ويا الاجل كله بحساب مكتوب

غلبت اسطر انا بقلمي كل يوم مكتوب

منتظر انا زجلك معايا وراضي بالمكتوب

استاذنا الكبير / صلاح النجار
حضرتك مشفتش الموضوع ولا ايه ؟؟؟؟

بدي أقدم تحية وهدايا وفيها ورود

ذوقك شملني وانا مستني بختي يعود

امشي وراك وف إيدي ألف زهرة وعود

أبخرك بيها من كل عين وأي حسود

آسف على التأخير لظروف خارج الإرادة

داب الفكر وياي ويادوب العيون بتراري

تشوف شعرك وزجلك نجم في السما عالي

متمكن بكلامك وفعل المردود عندك كدا عالي

وكل اللي يشوفني وياك يطلبلي لطف الباري

يا ما كنا زمان نعمل حساب للضيف

وانت حبيب والله مش سحابة صيف

قول ولا يهمك من العزال والطيف

دا احنا سوا نقول كلام عسل ونضيف

فرقت معاي واحدة اسمح لي أقولها خلاص

كل اللي قلته معاي بيدل عل الإخلاص

سحر البيان دايم يخليلك من الود الخاص

عالي المقام ف قليبي ولا يهمك من الخُباص

صفت معاي العوازل وراحت تقول الآه

من كتر حسادي بقيت أصرخ واقول آه

حبيبي سايبني وليلي واخدني غربتي وياه

وأنا اللي قتل مني الهوا سنيني وعدا وتاه

أنا مستني لو انت صاحي ...

وإن كنت نمت فليس على النائم حرج وألف سماح

هقول ايه ليك تاني بعد الكلام بعاليه

فرحتني وانت متمكن بالكلام ومعانيه

ساكن في قلبي والله حبك يا استاذنا

شاعر وفنان اروح فين بس انا فيه

هقوم وابدء معاك الحكايه من الاول

اعذرني اصلي لقيت الغياب عليك طول

هات ياعمي تاني زجلك واشعارك

هتلاقيني مستمع جيد مهما الوقت كدا طول

لو كان باليد كنت اجيب نجم من السما عالي

اقدمه هديه لصاحب مقام رفيع كدا وعالي

قالوا زمان حكمه قديمه ولسه قاعده بتلالي

يابختك ياللي تماشي الرجال تفضل طول الزمان غالي

يارب يديلك حبايب كمان وكمان

دا القلب داعيلك تكون في أمان

يا للا نقول زجل يعجب الخِلان

وانت اللي عالي يا أجمل الإنسان

ناهيك ياللي تقول عليا صغير السن والروقه

اتفرج عليا مع الكبير وانا بتعلم منه علي روقه

اصل الكبير فينا يا ناس عالم وشاعر

تحس الشعر بيجري في دمه وفي عروقه

هويت الغُنا من ......... صغر سني بناي

أعزف عليه في ......... ليل ملوش نهاي

امتا يعود حبيبي ...... ويحلا السهر وياي

زمن الفوارس راح واللي انكسر مش جاي

ياللي تلوم ع الزمان استني و حاذر كدا منه

زمن الفوارس صحيح انتهي ومفيش ولاشيئ منه

بس صفة الاخلاص والوفا خدوها الرجال منه

شايفها بعيني فيك وفي ولدك مهما صغر سنه

هويت المر والصبر خلاني أحب الورد وفروعه

يا هل ترى منين اجيب ناس تفهم كلامو ونوعه

الكل حاسدني معاك وانا اللي مكوي ف ضلوعه

فين الرضا وفين حبيبي سابني بلوعتي ودموعه

هانت عليك نفسك بالمر والالم تكويها

ارجوك ياصاحبي بلاش المر يضنيها

دورعلي خل وفي يصون المحبه مايفنيها

ورب العباد موجود ياعم لكل نفس يشفيها

أهل الهوى صاروا في الحب لوعتهم

كل الحبايب تشتكي من ملاوعتهم

قالوا دواي حدا العطار يا لسعتهم

جسمي اتبرى من كتر خوفي ولوعتهم

مهما طالت العله تلاقي الدوا اكيد موجود

يشفي الجراح لو الالم ف الحشي موجود

افتكر نعسه وايوب لما سكن ف جسمه الدود

ناخد منها عبره للزمان ورب العباد موجود

دا نور النبي الهادي بيشفي كل سقيم

ونجمك العالي ينده في الذكر والتسليم

هو الواحد الأحد لينا معاه نغم ترانيم

ملايكة الرحمن تنزل بالحق والتعظيم

ماتيجي نفكها شويه ونتحرر من الاصفاد

نقول كلام زين ومعدول تغير مننا الحساد

عارفهم غيرانين قوي مني وقلبهم جواه احقاد

شايفني مع الكبير وبعلمه وشعره عليا هو جاد

دارت علينا الأحبة كلهم اتنين اتنين

وانا اللي وحدي عايش ما بين البين

هو الزمن تقول عليه ولّا و راح فين

عمري اتسرق مني وليه ما تبكي ياعين

» مساجلة شعرية بين الأستاذ مصطفى عدلي و الأستاذ محمد جلال
» مساجلة شعرية بين الأستاذ عبد الفتاح والأستاذة زهرة
» مساجلة شعرية جديدة للأعضاء
» مبروك للاستاذ حمادة شحات
» الاستاذ حمادة شحات بارك الله فيك علي هذا العمل