مسابقة شعرية في الرباعيات لأعضاء المنارة

هامتك وسط الرجال مرفوعه
بادبك وبطيبة القلب متبوعه
للخير والنصيحه دايم مدفوعه
زهرة ومن الشوك منزوعه

هات ياعمي الناي وغني لي
من حبي فيك ياناجح احتار قلبي ودليلي
نفسي اشوفك مرة ويوم تجي لي
اقوم معاك بالواجب معرفة الرجال املي ودليلي

ياريت كلام الواو وفنه ومين يدريه

وناس كتير تعرف حروفه وتتندر بيه

زي القمر ينوِرْ حياته ويدّارىْ فيه

حبيبي النبي صلِّي عليه وتتداوى بيه

هانت عليا الدنيا لما سمعت مدح الحبيب
لما يكون معايا جرح بمدح النبي بيطيب
اسمك محمد يانبي وللامه خير طبيب
ومن صلي عليك يشفي وكل جروحه تطيب

بحبكم والحب له الف معنا
نفسى فى يوم صدفة تجمعنا
الحياة من غيركم ملهاش معنا
نصرخ بعلو الصوت والكل يسمعنا

آه م الحبايب وم الخلان والراجل الجدع ليه الخيلان ( الخيل لان )

طلب طبيبي مني الدوا قلت ما هو اللي خيلان ( خي لان )

يعرف يداوي الجروح وليها ألف خِلْولان (خِلْ ولان )

وأصلي الهوا جه سوا ولي م الرجال خلان ( خِلْان )

نعمل ايه وايام بتعدي من العمر من غير حساب
ياريت الصبا يعود يوم تلاقي كل عاصي تاب
ونعمل ايه في المكتوب اصله القدر مسطره في كتاب
لكل منا اجل والرزق والعمر نازلين معاه بكتاب

بالله عليك يا اللي انت لمعادي

ما تديني ما اقدرعليه وما تعادي

دا اللي يعادي فيك شوية له أنا معادي

والحُسْنْ من نور النبي وليك ما اناعادي

ياللي انت من بين الحبايب خدتك لي صاحب
برغم فرق السن منك انا اتعلم اكون صاحب
كبير مقام وعالي ومقامك غالي علي صاحب
عمنا صلاح النجار يازين الرجال اللي تتصاحب

بالود والصفا كل الأمور بتهون

ولما قلبي صفا راح الزعل والهون

دا أنت الأصيل والوفا ومش عليا تهون

حمادة صاحبي والجفا دا طبع اللي يخون

نايم ف حضنك يا أمي بس خايف م السباع
اللي راعبين البلد ووحوش جياع
كل يوم بيجيبوا حبل يكتفونى
ويحرموني حتى من كلمة وداع

عراق الخير متقسم ......ومنداس
بوش غزاه وعلى العزيز... داس
كل العرب بعوه بدون ...احساس
هيرجع تانى وعلى الفرس .ينداس

سبق الجمال ربانى وسط القلوب شق

يا بخت اللى فى حياته عرف طريق الحق

لافى يوم باع كلمته ولا للباطل رق

عمل اللى قاله المولى ومكانه فى الجنة اندق

قلمى يكتب ويسطر احلى الكلام
ينشد ويطرب ويشق نور الظلام
يحلم بفجرجديد تحلى فيه الأيام
أصحى ياقلبى لتموت على الأحلام

مين اللى قال ان الأحلام ممنوعه

ولا الأمانى سراب و مش صحيح متبوعه

الحلم زى الورد فى البستان هامته مرفوعه

دا الحلم مهما طال ما تسلاه وكلمته مسموعه

هظن الاحلام واقع .وعيش مسرور
شوارعنا فاضيه .... والتزام بالمرور
العنوسه انحلت ....والبنات فى سرور
الاسعارعال ....والاسربنعيم و سرور

روح ياعم اسامه اتغطى ونام

انت بتقول كلام ولا فى الاحلام

عايز تحل مشاكل الزحمة والترام

وكمان تبيد العنوسة وتجدد الأوهام

ملوك الدنيا فى النكتة هما المصريين
العالم كله يعرف كده واحناكمان عارفين
لومضحكناش على نفسنا يضحك علينا مين؟
خلينا بس نحلم خلينا دايماكده تايهين

نايمين فى العسل احنا نايمين

وبالأوهام تملى كده مخدوعين

ونقولك مين يعتب علينا مين

اذا كنا على القهر دايما متعودين

نوم العسل أوزى مابيقولوا نوم العوافى
ومنين يجى بس النوم والنور طافى
وكل يوم حريقة بس للاسف فين المطافى
أدعوا ربكم يسهلها ده هو الشافى المعافى

يا مطافى القلوب طفيها

طول عمرى انا معجب بيها

على الغالى متربى انا فيها

ولا يهمك سهام أعاديها

أحلم فى زمن الحلم مش مشروع
أهم حاجة فيه هى صاحب المشروع
أما الغلبان .نبقى نشوف الموضوع
دى الكبير كبير وصوته دايما مسموع

عايز اطير فى السما وانفش انا ريشى

وتعيشى حضن ودفا يا ام البلاد عيشى

ما تلمى ولادك بقى وكفاياك من تطفيشى

دا مهما كنتى بقى عمرك ما هونتيشى

ينبوع حنانك نضب يا مصر وجفاني
وانا اللي شايلك ما بين دمعي وأجفاني
قدمت فرض الولا بإخلاص وتفاني
ما حصدت غير الجفا ف غربتي رماني

ياللى نسيت أهلك وصار العدو لك حبيب
دى أهلك هما سندك ومكانك مهما تغيب
هيجى يوم تكبر وشعر راسك يشيب
يومها لاهيفيدك مال ولا حتى طبيب

» مسابقة شعرية في الرباعيات لأعضاء المنارة
» إعلان نتيجة مسابقة المنارة الشعرية في الرباعيات
» مسابقة شعرية شارك الان
» مسابقة المنارة الشعرية
» مسابقة المنارة الرمضانية الكبرى